El xigante tecnolóxicu anunció que superó’l millón d’unidaes vendíes de la so nueva consola Play Station 4 (PS4) nos Estaos Xuníos y Canadá durante’l so primer día nel mercáu. Asina lo comunicó en rueda prensa’l director executivu de Sony Computer Entertainment, Andrew House, señalando que fueran los datos de ventes correspondientes al 15 de payares, primer día nes tiendes. Demientres que la so predecesora, la Play Station 3 (PS3), tardó tres meses n’aportar al millón d’unidaes vendíes.

Agora espérase’l llanzamientu de la PS4 n’Europa y América Llatina, que va producise’l 29 d’esti mesmu mes. La PS4 ye la nueva apuesta de Sony en siete años y va entrar en competencia directa cola Xbox One de Microsoft, que va tar disponible en 13 países a partir del 22 de payares.

Una de les principales diferencies cola PS3 ye que Sony fixó una suscripción mensual pa poder xugar en modu multixugador on line a dellos de los xuegos de la nueva videoconsola. La empresa xaponesa estableció una tarifa de 6,99 euros n’Europa y 9.99 dólares nos Estaos Xuníos a cada usuariu por disfrutar de los videoxuegos nos que los xugadores compitan ente ellos en llinia, lo que representa la más grande parte de los trenta títulos que va llanzar al mercáu.

El preciu de la videoconsola ye de 399 dólares nos Estaos Xuníos y n’Europa va costar 399 euros, cásique 25% menos que’l preciu inicial de la PS3, consola de la que tien vendío hasta 80 millones d’unidaes a lo llargo de 7 años.