Organizada pol Ayuntamientu de Valdés y baxo la dirección científica de Margarita Salas, la Selmana de la Ciencia de L.luarca entamará esti miércoles 20  na Sala Municipal d’Exposiciones “Álvaro Delgado”, cola conferencia “¿Cómo actúen les drogues nel nuestru cerebru?”, al cargu de Manuel Guzmán, caderalgu de Bioquímica y Bioloxía Molecular de la Universidá Complutense de Madrid.

Como dexara dicho notres ediciones la doctora Salas, cada científicu trai a L.luarca lo último de la so especialidá. Asina, el xueves 21, na mesma sala, José Lucas, profesor d’Investigación del CSIC, Centru de Bioloxía Molecular “Severo Ochoa” ya Investigador primeru del Centru d’Investigación Biomédica en Rede d’Enfermedaes Neurodexeneratives, va falar “Del códigu xenéticu a los animales tresxénicos pa la buca de nueves terapies”.

La serie de conferencies echa’l piesllu’l vienres 22, nel Salón d’Actos del Institutu “Carmen y Severo Ochoa” de Vil.lar de L.luarca, cola conferencia “La mio experiencia investigadora”, al cargu de la propia Margarita Salas, profesora “ad honorem” del Conseyu Superior d’Investigaciones Científiques nel Centru de Bioloxía Molecular “Severo Ochoa”.

De siguío, va entregase a Margarita Sala la distinción Amiga de la Biblioteca Pública Municipal “Joaquín Rodríguez”, de L.luarca, entregaránse los premios Severo Ochoa y fadráse una ofrenda floral na tumba de Carmen y Severo Ochoa.