Por Ismael González Arias.- Pregunta propia d’una xunta o congresu de musicólogos: ¿esiste un soníu propiu de la cultura d’un pueblu? O, lo que ye lo mesmo: ¿dalguién ye quién a distinguir pol soníu ambiente a qué cultura pertenez?

Trátase d’un pregunta capciosa, porque incita a respuestes mui militantes. Respuestes que toquen directo’l tema de la identidá: al fechu de que cada cultura puea definise por un ámbitu sonoru particular y propiu. Preguntes relacionaes: ¿esiste un soníu propiu de los campos de fútbol asturianos con respectu al soníu xeneral de los campos de fútbol españoles o portugueses? Un tarrén que vien siendo estudiáu nos últimos años por un bon númberu de musicólogos, porque refier a aspectos populares corales qu’acaben definiendo al llugar y al pueblu que los emite. ¿Esiste un soníu característicu de les manifestaciones reivindicatives asturianes que les estreme de les que se dan, por exemplu, na vecina comunidá de Cantabria? ¿Esiste un soníu ambiente nos centros comerciales asturianos que sirva a los espertos de márquetin de la propia casa comercial pa definir que s’alcuentra delantre d’un clientela asturiana? ¿Esiste un soníu xeneral propiu de la plaza atacada de xente n’Asturies que puea valer de referente pa dixebrala de la Puerta del Sol de Madrid o de la Praça do Comerço de Llisboa?

Toa esta serie de preguntes nun tan formulaes ensin criteriu nengún. Esisten notros ámbitos y tan dándose respuestes a elles notres cultures. Parte la so formulación de la clásica espresión de Merriam, “la música como cultura”, p’abarcar tol conxuntu de relaciones que la música caltién cola vida sociocultural d’un pueblu y que s’axunta al campu d’estudiu de l’antropoloxía de la música.

Una posible interpretación d’una respuesta afirmativa a toes eses preguntes ta na mente de toos: de ser sí la respuesta ye de por sí asgaya como pa inferir la esistencia d’una cultura propia. La música, en xeneral, pue definir una cultura. Por ello, en bona midida, la nuestra cultura encuadrase dientro del términu d’occidental porque respuende a los parámetros establecíos de lo que ye la música occidental. Pero, si esto ye cierto falando de temperación, ritmu y estructura estrófica, ¿nun habría posibilidá d’afayar un sustratu sonoru colectivu que permaneza vivu nes manifestaciones colectives y que seya por sí mesmu quién pa estremar subcultures bien delimitaes dientro de la cultura occidental?

Pa responder a esta pregunta tien de tenese en cuenta que ye’l silenciu, na nuestra cultura occidental, el que nun suel tar bien vistu, yá que hasta la propia concepción relixosa de la meditación contempla unes músiques propies dende los primeros tiempos del cristianismu y que, col pasu de los años, acabó resumiéndose nel cantu gregorianu. El soníu ambiente lo que fai ye combatir el silenciu. Da igual qu’esti soníu lu xenere la música ambiente de los grandes almacenes, la televisión familiar encesa en casa a la hora de la cena o los himnos patrióticos nun desfile militar. El propósitu ye siempre’l mesmu: combatir el silenciu.

Asina lo escribió en 1988 Murray Schafer nel so llibru “Klang und Krach. Eine Kulturgeschichte des Hörens”, nel que diz: “A les persones présta-yos facer ruíos pa ser conscientes de que nun tan soles. Dende esta perspectiva, el silenciu total ye la negación de la persona humana”. Asina lo recueye Josep Martí nel so trabayu “Músicas invisibles: la música ambiental como objeto de reflexión”, cuando diz: “Nada meyor que’l fondu musical pa exorcizar la incomodidá que sienten los clientes d’un restorán cuando, naquellos momentos nos qu’inda hai poques meses ocupaes, l’únicu marmullu que se percibe ye’l ruíu de los cubiertos al chocar cola cacía. La música pue aparecer como un verdaderu bálsamu pal silenciu sepulcral, que pue producise nes sales d’espera o nel momentu de dir recoyer l’automóvil nun aparcamientu subterraneu de grandes dimensiones. Nada meyor tamién qu’un sele marmullu musical pa solventar el malestar que se siente nun espaciu zarráu como l’ascensor, cuando nun hai nada que dicir al usuariu que lu comparte, o pa facer más soportables los momentos d’espera telefónica cuando nun ye posible atender la llamada de forma inmediata”.

Pa dellos autores, como Benito Álvarez-Buylla, la tonada tradicional asturiana, y más en concreto les nomaes braves y arrieres, nun son más que la nuestra particular manera d’exorcizar el silenciu. ¿Podríen estos soníos tradicionales ser parte d’un soníu colectivu o conformar ente ellos un soníu colectivu que defina la nuestra cultura musical como propia? Desconozo si esiste respuesta pa esta pregunta o si, nel fondu, nun toi más que faciendo la mesma pregunta qu’al principiu. Álvarez-Buylla nun tenía duldes al respectu: “Indudablemente la tonada asturiana constituye un ejemplo único de expresión exacta de una personalidad a través de la música. Sea cualquiera su origen e influencias recibidas, la asturianada es una formade manifestación rabiosamente autóctona que se deriva directamente de una tierra determinda que es Asturias, y que pertenece a unos hombres arraigados en esa tierra; y en cada canción cada cantor se trasciende en esa tierra y esos hombres, matizando al mismo tiempo su comunicación de un acento individual inconfundible”.

Con too, y venciendo l’escepticismu col qu’anicio l’artículu, anque nun se me note, tengo de dicir que tengo tomaes delles notes al respectu del soníu ambiente propiu de les sidreríes asturianes. Trátase d’ún de los últimos ámbitos nos que tovía nun entró la nomada música ambiente. Empezó a llamame l’atención depués de dexar encesa la grabadora na sidrería Madrid de Mieres por mor de la grabación de los cantares que surden de manera espontanea y que, a lo cabero del añu 1999, diben acabar formando parte del nuestru trabayu “Les 40 Principales: cancioneru popular de Mieres”.

El soníu xeneral (lo que la xente llama: el ruíu de fondo) d’una sidrería sube bien de decibelios per enriba del soníu xeneral d’una cafetería, por más que nesta s’alcuentre encesu’l televisor y tea sonando, anque mui atrás, el Hilo Musical. Hasta tal puntu ye característicu esti ruíu de fondo de les sidreríes que tol mundu sabe que nun ye quién a trespasalu más que’l soníu de la gaita y que la voz potente d’un cantador. ¿Taremos delantre del últimu ámbitu nel que se desarrolla’l soníu xeneral de la nuestra cultura? Vuelve a tratase d’una pregunta capciosa. Pero, ensin dulda, nun ye un mal campu d’estudiu.