Stephen King ye’l gran superventes de la lliteratura fantástica. D’ehí que resulte toa una revolución nel ámbitu mediáticu que torne a recuperar el personaxe dún de los iconos de la lliteratura fantástica qu’él mesmu creara 36 años atrás. D’aquella la novela titulóse “El resplandor” y la so secuela anguaña lleva por títulu “Doctor Sueño”.

La obra orixinal de va más de trenta años llevárala al cine Stanley Kubrick, con Jack Nicholson como protagonista. Apienzaba, asina, a decatase de la impresionante fama que-y vendría depués del éxitu algamáu. Nun paró d’escribir dende entós. Nestos últimos cuatro años, “Doctor Sueño” ye la tercera novela que presenta. Como les anteriores, convertiráse en nada nun nuevu best seller del autor.

Siempre comentara que-y prestaba regresar al personaxe central de la novela orixinal, aquel neñu que percorría en triciclu los siniestros cuartos y pasiellos del hotel Overlook. Agora, 36 años depués, el protagonista ye un adultu con problemes alcohólicos y ensin residencia fixa que vive atormentáu peles sos visiones y les pantasmes de la infancia.

Torna, asina, ala hestoria de “El resplandor”, que fuera tres de la so publicación númberu ún na llista de los más vendíos de The New York Times. Tampoco va ser esta la única obra revisitada pol autor, un vezu que yá-y vien d’atrás.