Acaba de tener llugar nel ayuntamientu de Madrid una reunión na que Pablo del Amo, director de la empresa municipal ensin nenguna experiencia nel ámbitu de la cultura, anunció la tresformación de la empresa Madrid Destino nuna empresa de xestión pública/privada y la privatización de tolos teatros y espacios públicos de Madrid: Teatro Fernán Gómez, Teatro Español, Teatro Circo Price y Naves del Español Matadero.

Esta anunciada privatización de la xestión d’estos espacios despertó l’alarma ente los trabayadores de la cultura madrileña, que ven nesta primera acción de l’acabante de crear Madrid Destino, la nueva responsable de los espacios culturales madrileños, el modelu de xestión que l’ayuntamientu plantea aplicar a prácticamente tolos espacios teatrales.

L’home fuerte na dirección de la empresa, Pablo del Amo, con un ampliu currículu en despidos por mor de los sos anteriores cargos como conseyeru delegáu de Madridec, onde impulsó l’ERE qu’afecta a la metada de la plantilla -38 trabayadores- y como directivu de Repsol YPF, onde se llevó per delantre a 25 mil trabayadores durante’l procesu de fusión.

El pasáu 5 de payares, un aconceyamientu nel Círculu de Belles Artes servía pa concretar el nacimientu de la Plataforma pola Defensa de la Cultura, un grupu enllenu de cares conocíes n’onde s’atroparan dende collectivos de trabayadores hasta empresarios del sector. Estos ataques al sector cultural públicu esconsonaron especialmente la capacidá d’organización per parte de los trabayadores de los teatros. Na Coordinadora de Trabayadores del Espectáculu, nacida va dos años, agrúpense’l Sindicatu de Guionistes Alma, Técnicos Audiovisuales y Cinematográficos del Estáu Español, la Unión d’Actores, CNT Gráfiques y otros collectivos de trabayadores del área teatral y audiovisual.