Esti sábadu 16 de payares va tener l.lugar la presentación del poemariu “Testamentu”, ganador de la XXI edición del Premiu Teodoro Cuesta de Poesía, el más prestixosu de tolos que se fain n’Asturies y que fueran ganando a lo l.largo d’estos últimos años las voces más sobresalientes de la l.literatura asturiana. L’actu desendolcaráse nel Palaciu Merás de Tinéu, a las 18:00h.
“Cona pal.abra serena que da’l pasu del tiempu ya l’alcurdanza”, asina escribe Elías Veiga esti poemariu que quier ser testamentu d’un mundu que vei cambiando, pero onde tovía al.luma’l burrayu de lo que fuora:
“Dalgo quedóu, un sueñu, un árbol
una imaxen d’esperanza
ou’l recuerdu qu’inda queima
no corazón del augua
la simiente”.
“Testamentu” ía’l documentu escritu que guarda las pal.labras de casa, los sueños de la nuesa xente, tamién las derrotas ya la distancia, pero sobre too l’espíritu d’un pueblu que nos fai ser como somos.
Elías Veiga, nacíu en Presnes, Ayande, en 1972, ía una voz consolidada, pura y clara, de la poesía asturiana con dos poemarios publicaos: “La tierra fonda” (2004) y “El Robinson Astur” (2007), pol que recibió’l Premiu de la Crítica d’Asturias nel 2008.
