La escritora Marisa López Diz resultó ganadora del Premiu María Josefa Canellada, que con una dotación de 3.000 euros concede la Conseyería d'Educación, Cultura y Deporte del Principáu d'Asturies.

A esti gallardón, qu'algama la so sesta edición, podíen presentase obres de lliteratura infantil o xuvenil, con independencia de que se tratara de noveles, compilaciones de cuentos, obres de teatru o poemarios, siempres que los testos fueren inéditos y tuvieren una estensión mínima de doscientos cincuenta versos pa la poesía y de trenta páxines a espaciu doble pa los demás xéneros.

El xuráu encargáu de valorar los ocho trabayos presentaos reunióse a les 13.00 hores de güei, 13 de payares del 2013, na Casa la Cultura de Santoloya (Cabranes) baxo la presidencia de la directora xeneral de Política Llingüística, Ana María Fueyo Llaneza, y cola participación de los escritores y especialistes en lliteratura infantil y xuvenil Milio Rodríguez Cueto, Maite González Iglesias, Paz Fonticiella Gutiérrez y José Luis Remis García. Ente los miembros del xuráu figuraba, amás, Alonso Zamora Canellada, fíu de la escritora María Josefa Canellada, que da nome al gallardón.

Ente les obres presentaes, el xuráu decidió por unanimidá conceder el Premiu al testu tituláu Tatuaxes nel corazón, destacando, según consta nel acta «l'adecuación temática y formal a la edá de los llectores a la que va dirixida la obra, qu'amás avera la lliteratura xuvenil a la modernidá de les nueves tecnoloxíes y elementos gráficos».

El testu foi presentáu col seudónimu «Montenegro». Abierta la plica, l'autora ganadora resultó ser Marisa López Diz.

Marisa López Diz (Xixón, 1970) ye llicenciada en Filoloxía hispánica y especialista n'asturianu y gallego-asturianu, llingües les dos nes qu'escribe davezu tanto poesía como narrativa. Tien ganao premios lliterarios como'l Fernán Coronas (1998), l'Elvira Castañón (2001) o'l Premio Xeira (2007). Nel xéneru poéticu tien les obres Tiempu de tristura (1998) y A terra esqueicida (2007), n'asturianu y gallego-asturianu respectivamente. En cuantes al xéneru infantil, publicó los llibros Poemes de carambelu (2006), Binoca (2008) y Malva y el pasapallabres (2010). Nel 2012 estrenó'l curtiumetraxe A fiya del xastre. L'otru campu artísticu nel que trabaya ye la música: forma parte del dúu Mestura, col que publicó dos discos, Agua del norte (2006) y Poemes de carambelu (2008), y agora atópase grabando A terra esqueicida, sobre poemes del so llibru homónimu.