La vacunación n’España escontra la tuberculosis vien de superar una primera etapa de prebes y los resultaos apunten a que ye segura, anque tienen de facese más comprebaciones, como analizar la respuesta del sistema inmune y prebala en neonatos.

El primer ensayu clínicu de la vacuna MTBVAC, la primera basada en microbacteries d’orixen humanu, apienzó’l pasáu xineru nel Hospital Universitariu de Vaudois, en Suiza, con 36 voluntarios adultos ente 18 y 45 años, y esti martes los sos responsables anunciaron en rueda prensa’l final d’esta vacunación.

La fase 1 d’esti ensayu clínicu tuvo como obxetivu principal prebar la seguridá de la vacuna n’individuos sanos y, depués, la inmunoxenicidá (capacidá d’estimular la producción d’anticuerpos), lo que se tien de comprebar agora durante 7 meses. Los primeros resultaos d’esta fase, qu’inda nun se publicaron en revistes científiques, apuenten a la seguridá de la vacuna.

Esta vacuna preventiva podría ser una realidá en 10 años si tolos resultaos siguen siendo positivos. Los sos responsables negocien agora la so financiación –necesiten ente 150 y 200 millones d’euros- pa poder continuar les siguientes fases del ensayu clínicu.

La nueva vacuna busca activar el sistema inmunitariu pa qu’esti seya quien a reconocer al bacilu de la tuberculosis y protexa a llargu plazu a la forma más común de la enfermedá: la respiratoria. L’obxetivu que qu’ésta –d’una sola dosis- sustituya a l’actual vacuna escontra la tuberculosis –nomada BCG-, de 1920.