A diario afayamos nestes feches noticies nos medios de comunicación rellacionaes col mundu de la micoloxía: un grupu de rumanos deteníos depués de pañar un cientu kilos de setes o sobresaturación nos pinares de la xerra del Guadarrama pola cantidá de madrilanos qu’ataquen, goxa en mano, los sotos y les viesques del valle de Lozoya.
Asturies, Cantabria, Galicia, Lleón y el norte de Portugal pertenecen por tradición cultural al area d’escasa tradición micolóxica. Hasta’l puntu que bien d’estudiosos falen de que, en cuanto a les setes, España dixébrase en dos zones culturales bien dellimitaes: al sur del Dueru y al norte del Ebru, onde les setes comiéronse tradicionalmente; y el norte del Dueru, onde siempre se diera una cierta micofobia. Llendes que pa dellos hestoriadores marquen ente la cultura íbera, de llarga tradición setera, y la celta, que renegara siempre d’elles.
Estudios llingüísticos amosaben que les setes teníen, asina, tradicionalmente nome en castellanu, catalán y vascu, demientres carecíen d’él o lu teníen despectivu, n’astur-lleonés y galaico-portugués. Estudios más recientes fueron confirmando en bona midida esta tesis. Nes casu d’Asturies, alvirtiendo que bien de setes tienen nomes rellacionaos con belenos, bruxeríes o santos. De manera que’l nome xenéricu de seta n’Asturies ye “pandeculiebra”.
Con too, los que s’averen a les Xornaes Micolóxiques de Mieres organizaes pola Asociación Micolóxica La Pardina el fin de selmana del 15 al 17 de payares, van poder comprobar como, más allá del xenéricu pandeculiebra esisten munches setes con nome propiu n’asturianu. Dende esta páxina invitámosvos a reconocer pol so nome científicu les que popularmente se conocen como la seta la corra les bruxes, la mángara, la xema, el carapuchu, la seta’l diañu, la seta los muertos, la seta San Matéu, la oreya Xudes, el fungón, el setón, el mataparientes, el pántagu, la seta primavera, la seta San Xuan, el turullu la güestia, el morrín, les barbes de Santu Antón, la llingua la vaca, el rebeyón, el peudellobu, el peudexigante, la pardina, l’aparasol, la seta’l rayu, la seta’l sapu, l’arzolia o la cogorda.
