Nel mes de febreru, el presidente d'Iniciativa pol Asturianu, Inaciu Galán, aconceyaba nel Congresu de los Diputaos, en Madrid, con representantes de los cuatro partíos que tienen miembros electos por Asturies nesta cámara: PP, PSOE, Foru ya Izquierda Xunida. D'aquellos conceyos surdieron dalgunos compromisos, como foi la busca d'una partida nos Presupuestos Xenerales del Estáu pa l'Academia de la Llingua Asturiana (ALLA), única academia de toles de les llingües del estáu español que nun tien nenguna partida asignada. Estos díes atrás, dempués de dalguna conversaciones coles formaciones confirmóse la presentanción d'enmiendes a losPresupuestos per parte d'Izquierda Xunida, (que yá la presentó l'añu pasáu nel Senáu), y de Foru.
Les enmiendes permitiríen, de llegar a aprobase, que l'ALLA cuntará per primer vegada na hestoria con un presupuestu del gobiernu central pa la so financiación. La enmienda d'Izquierda Xunida reclama 75.000 euros y la de Foru, 143.000 euros, dambes reclamando'l principiu d'igualdá ente les llingües del estáu. Pa Iniciativa pol Asturianu, como se-yos espresó a les fuercies polítiques a lo llargo de les conversaciones "la cantidá agora ye lo de menos, lo importante ye introducir esta partida, que puede dir asemeyándose a les de les otres academies del estáu nos siguientes años".
Pela so parte, los diputaos asturianos de PSOE y PP amosaron una bona disposición, anque nun presentaron enmiendes a los Presupuestos de 2014. Iniciativa pol Asturianu va trabayar pa que dambes fuercies apoyen nes votaciones estes dos enmiendes. Por mor de l'aritmética parllamentaria, ye necesario que'l PP vote a favor de dalguna d'estes enmiendes pa que pueda llevase alantre la propuesta, lo qu'esperamos qu'asoceda y pa lo qu'Iniciativa pol Asturianu va siguir trabayando estos díes, intensificando los contactos con miembros de dambes fuercies polítiques.
Iniciativa pol Asturianu quier felicitar a les formaciones polítiques por llevar al Congresu esta reinvidicación, que ye de xusticia. Y ye que nun dar nengún presupuestu pa l'academia asturiana, entidá oficial del Gobiernu d'Asturies, anque de funcionamientu autónomu, cuando'l restu de les entidaes sí tienen presupuestu, ye una clara marxinación del asturianu, que va contra los principios afitaos pola Constitución y la Carta Europea de les Llingües Minoritaries o Rexonales.
Seición de los presupuestos onde apaecen les partíes a otres academies (páx. 103)
