Angelin Preljocaj, destacáu creador francés, presenta un programa doble, dientro del Madrid de Danza 2013 de los Teatros del Canal, nel que destaca una de los sos meyores obres basada na partitura de Stravinski, “La consagración de la primavera”.
Creada pa 12 baillarines, les sos fontes d’inspiración son mui amplies y anque tamién parte del ritual, equí nadie muerre y l’herue camuna n’heruína, inspirada na muyer d’anguañu y nel so papel na sociedá.
Trátase d’una mui atrevida pieza revisitada recientemente pa conmemorar el centenariu de la so estrena en París. Tres de “La consagración de la primavera”, la segunda obra d’estrena ye “Anunciación”, creada en 1995 y cola que consiguiera, dos años más tarde, el Premiu Bessie a la meyor coreografía, en Nueva York. Esti pasu a dos interpretáu por muyeres, amuesa l’alcuentru ente l’arcánxel Gabriel y la Virxen María.
Fíu d’emigrantes albaneses, Preljocaj naciera en París en 1957. Tres d’estudiar danza en Francia, marcha a los Estaos Xuníos pa prosiguir la so formación con Merce Cunningham y Zena Rouiller. Un añu más tarde regresóa a Francia y comenzó a trabayar en varies compañíes. En 1982 anició a baillar con Dominique Bagouet y el 1984 fundó la so propia compañía, debutando cola obra “Aventures Coloniales”. Dende entós creó 38 pieces, bien d’elles cargaes de cierta polémica y otres n’importantes compañíes, como “Romeo y Xulieta”, nel Ballet de la öpera de Lyon, o “Le parc”, nel Ballet de la öpera de París.
