Tres de percorrer delles ciudaes europees, Madrid acueye agora la exposición “Terracotta Army – Los Guerreros de Xian”, que pue vese nel Teatro Fernán Gómez dende’l 13 de payares al 2 de marzu. En total, amósense 150 répliques a tamañu orixinal, ente les qu’hai guerreros, caballos y equipamientu de guerra del exércitu de terracota del primer emperador de Xina. El percorríu complétase con un documental cola hestoria del gran descubrimientu de los Guerreros de Xian.

Fuera en 1974 cuando, durante unes obres pal abastecimientu d’agua, afayóse esti conxuntu de más de 7 mil figures de guerreros y caballos de terracota a tamañu real, que fueran sapozaes pal mausoléu de Qin Shi Huang, l’autoproclamáu primer emperador de Xina de la dinastía Qin, en 210-209 enantes de Cristu.

Dende l’añu 1987, estes pieces tan consideraes como Patrimoniu de la Humanidá pola Unesco. En 2010 los sos descubridores y excavadores oficiales –l’arqueóloga Xu Weihong y el so equipu- recibieron el premiu Príncipe d’Asturies de les Ciences Sociales.