Madrid (EUROPA PRESS).-El presidente de l'Autoridá Palestina, Mahmud Abbas, dio instrucciones pa que sigan les investigaciones sobre la muerte del exmandatariu palestín Yasser Arafar, coles mires de "revelar la verdá a los palestinos y al mundu enteru", según anunció'l so voceru, Nabil Abu Rudeineh, tal como recoyó l'axencia oficial palestina de noticies, WAFA.

   La viuda d'Arafat, Suha Arafat, aseguró'l miércoles que los resultaos de l'autopsia realizaos sobre'l cadabre del expresidente palestín confirmen que lu envenenaron con poloniu-210. "Tamos revelando un verdaderu crime, un asesinatu políticu", afirmó.

   Una investigación realizada pola cadena qatarina Al Yazira foi la primera en revelar l'añu pasáu qu'había traces de poloniu-210 nos efectos personales d'Arafat que los médicos que lu atendieron nel hospital militar francés nel que morrió entregaron a la so vilba.

   Eso llevó a que fiscales franceses abrieren una investigación por presuntu asesinatu n'agostu del 2012, a pidimientu de la so viuda. Espertos forenses de Suiza, Rusia y Francia tomaron muestres de los sos restos pa sometelos a prueba, dempués de que l'Autoridá Palestina accediera a abrir el so mausoléu, que ta nel recintu de la Mukata, sede de la presidencia palestina.

   El director del institutu forense rusu, Vladimir Uiba, señaló'l mes pasáu a l'axencia rusa Interfax que nun s'alcontró nengún restu de poloniu nes muestres del cuerpu examinaes en Moscú, pero l'Axencia Federal Médicu-Biolóxica, de siguío, negó facer dalgún comentariu oficial sobre los sos descubrimientos.

   Los espertos franceses nun informaron sobre les sos conclusiones de forma pública nin compartieron los sos descubrimientos col equipu llegal de Suha Arafat. Una vocera de la Fiscalía francesa afirmó que los maxistraos que lleven la investigación nun recibieron los informes de los espertos hasta'l momentu.

INFORME ENTREGÁU A LA XUSTICIA

   Ún de los abogaos de Suha Arafat indicó que l'informe de los forenses suizos, encargáu pola cadena Al Yazira, va tornase del inglés al francés y entregase a los trés maxistraos de la población francesa de Nanterre, qu'investiguen la muerte del 'rais' palestín.

   El profesor David Barclay, un científicu forense británicu qu'interpretó p'Al Yazira los resultaos de los exames forenses suizos, aseguró que les conclusiones sobre l'analís de los restos mortales d'Arafat confirmen les pruebes anteriores, que yá detectaron traces de venenu na so ropa interior, el so cepiyu de dientes y delles prendes de vistir.

  "Al mio pensar, ye ciertu dafechu que la causa de la so enfermedá yera l'envelenamientu por poloniu", afirmó Barclay, en declaraciones a l'axencia de noticies Reuters. "Los niveles presentes nél son abondo pa causa-y la muerte", esplicó