Depués de que los pasaos 4 y 5 de payares la Policía Local de Mieres punxera multes porque la fueya d’autorización d’aparcamientu tuviera n’asturianu, los coches aparcaos esta tarde del 6 payares aparecieron con una nueva fueya redactada en castellanu y firmada pol xefe de la propia Policía, ante la negativa del Director de la Casa de Cultura Teodoro Cuesta de Mieres a facelo.
El mesmu coche que’l martes 4 de payares recibiera la primera de les multes ye’l mesmu qu’esta tarde tenía nel so salpicaderu la nueva fueya d’autorización d’aparcamientu en castellanu. Trátase del vehículu d’ún de los organizadores de les X Xornaes Solidaries que tan teniendo llugar esta mesma selmana na dependencia cultural municipal.
El Director de la Casa de Cultura Teodoro Cuesta, que nun quiso facer declaraciones a nengún mediu por tar de viaxe, entregara esta mañana a los responsables municipales la Llei 1/98, de 23 de marzu, d’usu y promoción del asturianu, vixente nel Principáu d’Asturies. Nel so artículu 4, referíu al usu alministrativu del asturianu, señala que “Tolos ciudadanos tienen derechu a emplear el bable/asturianu y a expresase nél, de palabra o por escrito”. Asina, tamién nel artículu 5, nel que s’indica que “Les publicaciones, impresos, modelos, folletos o anuncies institucionales van poder ser publicaos indistintamente en castellanu, bable/asturianu o nes dos llingües”.
Fontes municipales comentaben esta mañana que, ante’l fechu de que’l Policía Local qu’impuxera la multa podría ser obxetu de sanción por incumplimientu d’una llei, optóse pola solución de compromisu de que fuera la propia xefatura de la Policía la que ficiera l’autorización, nesti casu en castellanu.
La noticia convirtióse nuna de les más tuiteaes del día, pasando de 3 mil comentarios en facebook y teniendo entraes y comentarios en páxines d’axencia como iberoamerica.net que la fizo llegar a tolos países llatinoamericanos. La llarga llista de comentarios dexa n’evidencia l’actuación policial y llama l’atención sobre la falta de respetu a una llingua como l’asturiana poles propies autoridaes, nesti casu d’Izquierda Xunida que ye la que gobierna nel Conceyu de Mieres.
