Ismael González Arias.- A la revolución musical que supunxera la obra de Baldomero Fernández dientro de la tonada asturiana tien d’amestáse-y la del otru gran músicu y folclorista de la dómina, Eduardo Martínez Torner, dicisiete años más mozu y, poro, abondo más allonxáu de la influencia del nacionalismu musical y enforma más averáu a les primeres corrientes d’investigación musicolóxica.

Torner naciera n’Uviéu’l 7 d’abril de 1988, fíu de la catalana Filomena Torner, de la conocida familia de “Los Catalanes”, de la capital del Principáu, y d’Antonio Marínez Díaz, pastor de Llamu, Riosa, empleáu de la facienda de la familia materna. Estudió col citáu Baldomero Fernández, Saturnino del Fresno ya Ignacio Ruiz de la Peña, esaminándose llibre de los cinco primeros cursos de piano nel Conservatoriu de Madrid, finando los sos estudios tres años depués.

Tres de participar como alumnu na Schola Cantorum de París, de 1912 a 1914, dirixida pol compositor Vincent d’Indy, l’aniciu de la gran guerra failu tornar a Asturies. En 1916 ingresa en Madrid nel Centro de Estudios Históricos, dirixíu por Ramón Manéndez Pidal, adscribiéndose a la Sección de Musicografía y Folklore. Agospia na Residencia de Estudiantes, na que coincide ente otros con Federico García Lorca, que va escribir un pequeñu trabayu sobrelos cantares de bierzu y nel que va citar les añaes asturianes a partir deles notes que-y pasara’l propiu Torner.

La so obra más cococida, el “Cancionero Musicaldela Lírica Popular Asturiana”,publícase nel añu 1920 con un total de quinientes melodíes. Cinco años depués va anunciar la edición de la segunda parte, con mil temes más, qu’enxamás va ver la lluz y que los sos biógrafos consideren perdíu dafecho.

De la mesma manera que Baldomero Fernández emprimara a trabayar con El Maragatu y La Busdonga, Torner entra en contactu con Cuchichi, col que va entamar en 1924 un viaxe a Cuba y México pa llevar al acabu un total de ventiocho conferencies-conciertu sobre los más estremaos xéneros de la música tradicional asturiana.

La guerra civil española, y el posterior esiliu del músicu en Londres, desanicia bona parte delos sos trabayos d’investigación folclórica, centrándose dente entós nes sos retresmisiones de música española dende la BBC y nel so trabayu nel Institutu Español de la capital británica.

La trescendencia del “Cancionero” ye descomanada y pue siguísela ensin perda ente los cantadores de tonada, más que nada a partir del impulsu de Diamanina Rodríguez y la edición del discu que-y dedica a finales de los sesenta, como tamién nel surdimientu del primer folk modernu, del Nuevu Canciu Astur, de la música celta o dela renovación moderna de la tonada.