UN REPASU A LA MITOLOXÍA ASTURIANA CONTEMPORÁNEA
Esta ponencia, que debería acostinar el más satu títulu de Un repasu a la mitoloxía asturiana contemporánea y dellos comportamientos arreyaos, tien l´enfotu d´atropar, primero, y d´analizar, dempués, una serie de mitos de calter políticu (no que cinca al ámbetu del so desendolcamientu, a la so voluntá d´interpretar toa o una parte de la hestoria asturiana y d´emburriala nuna determinada dirección, acorraxando otres interpretaciones opuestes) que dominen güei el discursu d´una parte, más o menos importante, de la nuestra sociedá.
Verdadera rocada ideolóxica, estos mitos, desurdíos nos grupos dirixentes –lo que nun quier decir siempre na derecha, según veremos llueu-, traten de desplicar, con calter universal, el papel héstoricu d´Asturies y la “esencia” del home asturianu, o de dalgunes circunstancies de la so sociedá; constituyen, darréu, un enguedeyáu entramáu, de mena, ñidiamente, fiticia, destináu a fabricar unes falses señes d´identidá que xustifiquen el roín papel de les sos clases dirixentes pa cola so sociedá, la so progresiva aculturación y, perriba tou, l´abandonu dafechu de los grupos cabezalerosde la defensa d´Asturies, al serviciu siempre d´intereses ayenos a los asturianos y tornaos d´espaldes a la propia realidá.
Tres precisiones, enantes d´enfilar na viesca onde florecen esta enfilandrada de mitos y comportamientos. La primera ye señalar que, independientemente del aniciu de los mitos –polo xeneral remanecíos na derecha, como correspuende cola estructura de poder y el desendolcamientu hestóricu, pero non siempre-, les que podíamos llamar postures polítiques “clásiques”, la derecha y la manzorga estatalistes, tienen los mesmos mitos y caltienen el mesmu comportamientu. Nin un sacramentu los estrema. Nun presenten ningún análisis peracabáu de la realidá asturiana, dala propuesta novedosa. Les dos sopelexen la mesma retórica mítica y –funcionalmente- antiasturianista, les dos dan la parpayuela col mesmu ruxerrux d´esencialismu universalista. Enta más, ye últimamente la manzorga la que persopelexa los mitos aniciaos na derecha: talos el covadonguismu resurdíu por Rafael Fernández [1], l´universalismu metafísicu sofitáu pola estinta revista Asturias (contiada, nun se mos escaeza, pol yá citáu personaxe y agavitada escandalosamente con publicidá institucional), el mitema de la pluralidá de les Asturies, ruxíu dende dellos rueldos “progresistes”. Pero, polo demás, nun hai una sola estremadura ente´l comportamientu y l´aceptación de la mesma retórica mitolóxica por unos y otros.
La segunda alvertencia consiste en señalar, perriba l´efectivu comportamientu uniforme, el mecanismu pel cualu se produz l´escaezu de los intereses d´Asturies. Grosso modo ye´l siguiente. Débil económica y políticamente´l nuestru país dende la Revolución Industrial, los partíos políticos d´ámbetu estatal equí llantaos nun son más que servidores y acostinadores fieles, de les diretrices, mandatos y programes de les organizaciones sociales y económiques centraliegues; son tamién vicarios d´intereses, modelos o normes foriates. Dotramiente, dende´l puntu de vista de los petites indivuales, al escaecer n´Asturies un modelu prestixosu proyectivu pal propiu rueldu, les organizaciones estatales, l´administración central, Madril, nuna palabra simbólica, preséntese como´l puntu de referencia, l´oxetivu vital al que, dárreu, hai que procurar contentar, servir, imitar nel so llinguaxe, sonsañar nos sos textos, pa poder algamar los puestos, talantaos como más importantes, que´l centru ufierta [2].
La tercera alvertencia facémosla afalando a talantar qu´estos enmazcaramientos ideolóxicos de la realidá, desurdíos en determinaos grupos sociales –les “élites” o grupos dirixentes, netos nel so comportamientu y talantamientu d´Asturies, yá remanezan d´ámbetos obreros o empresariales -, non cinquen sólo a esos grupos na so difusión, sinón que (como yera esperatible, d´otra mena, dárreu la so intencionalidá enmazcaradora y xustificadora del so papel, que, polo tanto, debe tratar d´algamar la universalidá , la xeneralidá, pa afatase como “oxetiva” y “natural”) algamen capes más amplies de la población, hasta llegar a afitase –en dalgunos casos- como verdadera imaxen colectiva de la mayor parte de la sociedá asturiana. Ñidio ye que la so difusión, fundamentalmente oral y per canales de prestixu, afala´l so afitamientu, al non permitir el desendolcamientu, l´espurrimientu, d´otros análisis non mitolóxicos, por tar monopolizaos, precisamente, los grandes canales de difusión ideolóxica polos grupos de poder qu´esparden y sofiten esta mitoloxía contemporánea.
Y dicho esto, yá, que, ñidiamente, requeriría desplicaciones más vagarientes y peñeraes [3], pasemos a esfollar, verdaderos monstruos vivientes, dalgunos d´estos mitos y comportamientos, esclucando nes sos coraes, yá non como aldovinones, sinón como estazadores de la realidá social. El llector escasamente atentu talantará darréu´l fuerte reyu que, desurdíos d´unes mesmes causes, aperiaos pa unes mesmes xustificaciones, amesta ente sí toos estos fenómenos [4].
EL MITU DEL COVADONGUISMU
Datos y descripción: Esti, analizáu por mí yá hai tiempu [5], ye´l más vieyu de los mitemes contemporáneos. En sustancia caltién que Covadonga ye l´aniciu d´España, d´una España d´una mena determinada, centraliega, unitaria, y, pa dalgunos, cátolica y conservadora. Talu sería, pa otros, l´aniciu d´Europa.
Desendolcamientu: Dos faces tien el mitu, que desurde nel sieglu XVIII cola Ilustración y algama la so peracabación teórica y emocional nel XIX, cola Restauración Alfonsina [6].
La primera faza cinca a la utilización del mitu fuera d´Asturies. Covadonga sería l´aniciu del Estáu Español, o meyor, de la Nación española, o, na versión estrema del mitu, la puesta en marcha de la España eterna, la recuperación d´una España prefigurada ab ovo y neta a sí mesma –esto ye, ensin hestoria- a lo llargo de tolos tiempos. Esta interpretación conservadora sirve pa trapecer y tracamundiar la verdadera hestoria estatal: la esistencia de munches “reconquistes”, los enfrentamientos ente los reinos cristianos, l´ausencia d´un proyeutu común entre ellos munches vegaes, la malquería de Castiella escontra los otros estaos peninsulares, etc. Al mesmu tiempu´l covadonguismu sirve-yos, pa inventar una pseudoidentidá, Asturies, que, siendo distinta ensin selo, ta perarreyada al restu del Estáu, constituyéndose, asina, en modelu de fidelidá qu´esfronar a les otres más retrolicaores.
Na segunda faza, dende´l puntu de vista internu, el mitu tien delles estayes. Apurre a los grupos dirixentes l´autosatisfacción pol so llabor hestóricu na construcción del Estáu, amás de la dignidá del orixen, que, siendo idénticu al d´España, xuxtifica agora´l so papel centraliegu y escaecedor de la propia tierra.
Dotramiente, y no que cinca a los asturianos en xeneral, el covadonguismu funciona como mitu consolador. Carente d´un patrón pa desplicar el so papel hestóricu (y, sobre todo, la so llarga ausencia hestórica dempués d´aquel momentu), el pueblu asturianu atropa nel mitu del covadonguismu (Asturies como fonte d´España o meyor, Asturies como España sustancial), que-y ufierten los grupos dirixentes, un modelu afayaízu y prestosu. Asina decíamos nel 1979: “Fechos como esti (la pérdida de papel hestóricu) afalaron l´aparición d´un pruyimientu, d´un desasosiegu psicolóxicu, que, resumiendo, podíemos interpretar asina: el pueblu asturianu, que se siente distintu, pero qu´inxamás asoleyó (-y asoleyaron, meyor) los patrones de la so personalidá, y al que-u tracamundiaren la hestoria, tien ñecesidá de desplicase qué ye y cuála ye la triba d´estes diferencies. Entós, y d´ende remanez el grandonismu, acude a la única desplicación posible, al únicu modelu d´autoconocimientu que la hestoria escrita (la qu´escribe la hestoria)-y da: el mitu de Covadonga. Los asturianos son, entoncies, según esti modelu, los amos d´España, a la que sólo ellos, el so llabor, caltuvo y formó. Con eso, l´asturianu qu´adeprende la hestoria nos testos y nes nes mentalidaes oficiales, o les que les espeyen inconscientemente, queda satisfechu y fartucu: yá cumplió col deber, fizo más que naide y, si fai falta, ta ñidio que pue volver faelo. Pa eso sigue funcionando´l mitu l´irrendentismu asturianu”.
EL MITU DEL AISLAMIENTU ASTURIANU
Datos y descripción: Asturies sería, según esti mitu, una rexón dixebrada del restu d´España por dificultaes de comunicación. Ello acostinaría un retrasu que nun sería más que de tipu temporal. Dotramiente dicho: la identidá asturiana nun sería diferencia dala, sinón puru dir detrás. La igua les comunicaciones acabaría cola diferencialidá, pescudada, ñidiamente, como atrasu. Darréu, los esfuerzos asturianos nun deberíen ser, inxamás, de caltenamientu de la identidá, sinón, metafóricamente, d´esaniciamientu de los kilómetros d´atrasu.
Desendolcamientu: El mitu, de tantu pesu na argumentación política de güei, padre d´una riestra interminable d´artículos de prensa, ye, ensin embargu un de los más ñidiamente retrucables, de los más bultablemente falsos. Porque, bramente, como Galicia, como Euzkadi, Asturies ye una rexón con dificultaes d´accesu por razones de mera orografía. Agora bien, ello non supón pa Galicia o Euzkadi, onde nun desurde la mitoloxía del aislamientu como desplicación de la “identidá” (o de la falsedá de les señes d´identidá, talu se pretende equí), la cañamina la so identidá.
Pero, amás, nun hai una sola razón de triba oxetiva pa caltener daqué mena d´atrasu d´Asturies na so hestoria. Durante la Edá Media, por exemplu, mantuvimos relaciones comerciales intenses con Francia, Países Baxos, Inglaterra, y visitárenmos los sos habitantes; fuimos la primera rexón del Estáu que s´incorporó al cultivu del maíz nel XVII y la primera tamién en beneficiase del esporpolle económicu de so; tamién el tabacu entró llueu na nuestra nación [7]; semos los primeros nel beneficiu de les mines de carbón piedra y na industrialización del XIX, etc. Nun hai, darréu, nin un solu documentu oxetivu que permita caltener l´aislamientu asturianu y, menos, la conclusión de que ye esi solu aislamientu´l que desplica la diferencialidá.
Ello ye que´l mitu tien dos finalidaes. D´un llau sirve a los grupos dependientes de Madrid [8] pa negar la esistencia d´una diferencialidá (d´una verdadera cultura asturiana) y, d´esi mou, xustificar el so abandonu de lo asturiano y la so entrega a intereses ayenos, xenerales o particulares.
Pero d´otra anda, el mitu ye tamién una proyección de la frustación del papel d´esos grupos dominantes, de la inseguridá de la so xera política y héstorica. Efectivamente, abangaos vocacional, política y económicamente sobre Madrid como ñuedu del Estáu; escaecíos, darréu, del suelu onde s´alluguen, esos grupos desprecien el so papel n´Asturies –que siguen teniendo pol so pesu social, pero que nun-yos resulta prestosu por pescudalu´l “non ser”-, al mesmu tiempu que caltrien el so nulu pesu nes decisiones na capital del Estáu, que ye onde nagüen por espurrise y ser vistos. Más entá, acostumaos a un ciertu rellumu social n´Asturies, esa vacuidá nel Estáu faise pa ellos insoportatible. D´esta mena, el mitu del aislamientu asturianu nun ye otra cosa qu´una metáfora inconsciente, la proyección de la frustración d´estos grupos, aislaos al mesmu tiempu de la so base llocal y de los grupos del Éstau onde arranen por enxertase.
EL MITU DE LA PLURIDÁ DE LES ASTURIES
Datos y descripción: El mitu afita, en sustancia, al través de sutiles desviaciones semántiques y de reblagos metafóricos, que la identidá d´Asturies ye plural, que´l ser de lo asturiano ye, satamente, el ser estremáu, multiple [9], enxertando tantu lo castellanu como lo asturianu. Traicionar esa pluridá sería frañar el so propiu ser
Desendolcamientu: Emplegáu na propaganda más vulgar, masuñáu por delles figures de la “intelligentsia” nacional, ye ésti ún de los tópicos modernos que topamos más vegaes per ayures. Como yá señalaba en La cultura popular asturiana: unidá y pluralidá [10], onde peñeré y desendolque´l mitu, y a onde empobino pa un análisis más estensu, emplégase dende sectores dependientes del centralismu (o naguadores de los sos arumes) pa defender la so actitú escontra les concretes señes d´identidá asturianes, o al marxen d´elles, calteniendo esa actitú como, precisamente, el ser mesmu de lo asturianu. D´esta forma, la utilización, por exemplu, de la llingua castellana, sería paradóxicamente, un rasgu de la identidá asturiana [11], que manifestaría, asina, la so personalidá plural. Nin que decir tien qu´esti mitema de la pluralidá ixamás s´emplega poles mesmes persones pa defender les señes d´identidá asturiana (pa decir, por exemplo, “puestu que la nuestra cultura ye plural, vamos defender l´asturiano xunto col castellano”) qu´estremen de les coordenaes que definen el Estáu, asoleyándose asina´l calter de mázcara xustificadora del mitu.
EL MITU DE LES MILENTA LLINGÜES
Datos y descripción: Como nún pentecostés, cada asturianu que nun falase castellán tendría recibío una llingua distinta, o, polo menos, una variante distinta de la llingua, de talu mou estremaes que nun perteneceríen, ensin embargu, a la mesma llingua, o meyor, nun sería posible falar de llingua, dada la bayura les variantes y, polo tanto, la imposibilidá d´un conceptu unitariu. Al mesmu tiempu, bayura y estremadura tala torgaríen la comunicancia ente los falantes, de mou y manera qu´habríen de comunicase ente sí en castellán. El mitu nun sólo cinca a parte la población, sinón que, con esa mesma pinta de mangaráu o tracamundiu cola que lu acabamos de desplicar, ye calteníu tamién por dellos llingüistes [12] como cosa “científica”.
Desendolcamientu: Non mos interesa equí desplicar la hestoria reciente del mitu, yá peñerada nel nuestru llibru La cultura popular asturiana: unidá y pluralidá, sinón esclucar nos sos fines y asoleyar el so significáu fonderu. El mitu, un sotema del de la pluralidá d´Asturies, tien como finxu atacar la posibilidá del usu normalizáu de la nuestra llingua y de, per otru llau, xustificar l´actitú castellanista y antinormalizadora de determinaos grupos sociales, arreyada munches vegaes a declaraes actitúes polítiques de castra centraliega.
El mitu ye falsu dafechu y mentirosu onde los haiga; ye, amás, un enfallamientu intelectual. Porque les persones que falen de “los asturianos” o “bables” como resultaos de la real diversidá diatópica, diastrática, diafásica, que l´asturianu tien, netu que toles llingües, nun falen, ensin embargu, de “castellanos”, “ingleses”, “italianos”, etc. Esto ye, al convertir en disímil un criteriu que pretende ser científicu, oxetivu, espeyen el so verdaderu calter ideolóxicu y póliticu.
Dotramiente´l mitu ta daqué espurríu, yá non ente los grupos sociales nos que desurde pa la defensa de los sos intereses y atitúes, sinón ente una parte consideratible de la xente asturiano. Efectivamente, son abondu los ciudadanos que falen de la pluralidá, de la permultiplicidá, de “los asturianos” y, darréu, de la so imposible normalización. Y, en preba d´ello, suel apurrise ún, o tolo más dos, exemplos, normalmente´l formáu polos sinónimos angazu (y la so variante llingazu), pradera y garabatu, aselando ehí tola exemplificación disponible na argumentación. Porque -y esa probeza d´argumentos y la casi dafechu monotonía ye la preba más rescamplante- l´espurrimientu´l mitu ente la población nun remanez de razones oxetives, sinón que ye espardíu dende determinaes fasteres que tuvieren hasta agora´l privilexu de los medios de comunicación y los canales orales, enxertada nellos la escuela.
EL MITU DEL UNIVERSALISMU
Datos y descripción: El rasgu definidor del calter del asturianu sería la so universalidá, la so capacidá de tar en toles partes y al serviciu de toles causes. Nún segundu significáu, al costín del otru, l´universalismu sería la capacidá de desprendese del so ser (posible) d´asturianu, de les sos señes d´identidá.
Desendolcamientu: Les clases dominantes asturianes definen al asturianu como homo universalis, esto ye, un home volcáu hacia afuera, que se topa igual dientru d´Asturies que n´otros países; pero sobre tou, sabe actuar y ser ensin dalgún rasgu esternu d´identidá (de peculiaridá), siendo, al mesmu tiempu, distintu. Esa verdadera imposibilidá metafísica, esi tracamundiu de la razón de predicar una identidá ensin que se manifieste (y, darréu, ensi qu´esista), esi barullu, en términos coloquiales, nun sólo ye un mitema desurdíu equí, sinón que lu emplegó Ortega pa oponer l´homo asturicus a los habitantes d´otres nacionalidaes españoles. Tales pintoresques palabres dixo: “en apartadas regiones del globo, hay asturianos tan asturianos como los más asturianos y que, sin embargo, ni han nacido en Asturias ni jamás la han visto” . Palabres que pola so falta de comprendoria aplaudiríen –y aplauden- los nuestros constructores de mitos.
Esta pretendía capacidá de ser un mesmu, o meyor, de selo ensin selo y, poro, ensin causar problemes al Estáu o a los intereses de los que se depende, constituye ún de los mitos más sopelexaos pola ideoloxía tradicionalista, tanto de manzorga como de derecha, y trata, d´un llau, de xustificar la cuadratura del círculu: cómo seguir siendo asturianu (y,pa enriba “más asturianu que nadie”, según suelen sopelexar) ensin selo; d´otramiente, el mitu trata de servir el centralismu un modelu de “peculiaridá” non conflictiva y que puea mirar en tientes a les otres.
EL MESIANISMU UNIVERSALISTA, O “PELAYISMU”
Datos y descripción: Covadonga representa la salvación d´España y d´Europa; 1934 ye un exemplu pal internacionalismu proletariu; la forma de desendolcase la nuestra autonomía ye –según fontes socialistes- un modelu pa los demás del Estáu y punxo un gavitu importante nel afitamientu la democracia. O, n´otru exemplu, un cabezaleru de la manzorga estraparlamentaria pedía pela televisión, nes eleciones xenerales de 1986, l´autodeterminación (o quiciavis la independencia) pa Ceuta, Melilla, Euzkadi, Cataluña... ;yá nun sólo non pedía l´autodeterminación p´Asturies nin l´aumentu de la so capacidá competencial, sinón que nin siquier falaba de los sos problemes.
Desendolcamientu: Según se ve nesta riestra d´exemplos, el mesianismu universalista, o “pelayismu”, dase con más frecuencia na manzorga estatalista que na derecha, aunque nos dos casos, el comportamientu ye´l mesmu: los fechos d´Asturies nun cuenten sinón como gavitu o retueyu de la hestoria estatal, europea o mundial (Asturies, ancilla Hispaniae o ancilla mundi”), esto ye, como gavitu de la so concepción mitolóxica de la HESTORIA. Y, al revés, les xeres que se puen entamar na nuestra patria tienen xacíu sólo si miren al porgüeyu estatal o mundial. Asina Asturies conviértese nuna plataforma vacia de la qu´entamar siempre “reconquistes”; nel abellugu últimu –o´l güevu primeru- de les grandes fuerces mítiques de la “HESTORIA”: el cristianismu, la revolución, el proletariáu, occidente... Dotramiente dicho, Asturies, la ensin hestoria, como puntu ceru, big-bang, d´otres hestories y de la HESTORIA.
D´otra mena nun s´escaecerá cuántu, al mesmu tiempu, tien el mitu de mecanismu compensatoriu d´un gran vaciu políticu, social y hestóricu.
EL NACIONALISMU METAFÍSICU
Datos y descripción: Según esti talantamientu, ye asturianu non el que vive n´Asturies, nin el que fala asturiano, ni el qu´esbrexa pola so tierra, sinón el que tien un empodrellamientu seminal cola mesma, o algamó misteriosos miasmes asturianos al so perocasional pasu periquí. Ello lleva, d´un llau, a arreyar Asturies a cualaquier persona destacable, seya prima tercera, tataranieta o sobrina d´un asturianu o asturiana; y anque inxamás tenga pisao Asturies, ye igual: ta afitada abondo con esi arreyamientu seminal la so asturianidá.
D´otru llau, y por inversu procedimientu, faise asturianu cualuquier individu destacatible qu´haiga pasao dalgunos díes n´Asturies, si ye que la so fama lo merez.
Desendolcamientu: La sustancia d´esti conceptu afítase en negar cualuquier valir d´asturianidá a la xera, a la llingua o daqué otru rasgu oxetivu- inclusu, a vegaes, la nacencia o la residencia –d´identidá nacional, p´allugalu, en cambiu, nún terrenu vaciu onde coinciden la fama del aponderáu (o “fechu propiu”, dicho d´otra anda) como asturianu y el que lu apondera (o que d´él “s´apodera”) como talu. Asina, los beneficiaos con esti conceptu metafísicu d´asturianidá (ente los que se cuenten xentes que nun tienen un sólu antepasáu asturianu, pero que s´alluguen daqué tiempu n´Asturies; xentes que tienen antepasaos asturianos, pero qu´inxamás pisaren la nuestra tierra) refuercen l´autoconsciencia que de sí tienen los que-yos dan el beneficiu (calterizaos pola so ausencia de trabayu pola patria y pola ñegación de les sos señes d´identidá), afitando, nel so pescudar, la validez del so modelu d´identidá vaciu y afitándolu, sobre tou, cola fama estatal del aponderáu, consolando, asina, el grupu atribuyente, de la so concencia d´aislamientu, enfotándose más nel so papel al marxen d´Asturies (cosmopolitismu, etc.).
Ñidiamente, esti talantamientu (que ye, a la vegada, comportamientu) ye una pura llamuerga onde flunde la razón. Porque un observador oxetivu nun dexará de ver que, pa estos grupos, delles veces ye asturianu la persona que tien residencia alministrativa, delles da-y el calter l´antigua residencia ocasional, otres l´arreyamientu seminal... Dafechu, l´únicu criteriu fonderu de clasificación ye la potencialidá del calificáu d´asturianu pa facer esporpollar les “bones calidaes”de los que lu califiquen, l´afitamientu del ego del individu o grupu emponderador.
Esti doble y caprichosu parámetru empobina munches vegaes a puros disparates, talu esti: “Otro ejemplo fue el curso de verano de la Universidad de Salamanca de Pendueles (Llanes). Allí invitaron a unos poetas asturianos porque escriben en bable y que eran unos desconocidos absolutos fuera del Principado. Yo me pregunto, ¿a qué Asturias representan? Son más asturianos que yo, que mi segundo apellido es Longoria, un toponímico de la región? No estuve alli porque yo no oficio de asturiano en la literatura”[13].
Dexando a un llau la última frase (y yá ye abondu pa nun seguir, darréu que, si nun s´oficia d´asturianu, ¿por qué paez mal que nun se lu llame a ún como asturianu?), pue alvertise que, pal falante, yera razón más oxetiva pa tar nesi alcuentru de poesía de les llingües d´España el fechu de tener un apellidu asturianu que´l fechu de tener que escribir n´asturianu, que dicho seya de pasu, yera la única razón pola qu´había una poesía asturiana, xunto a la gallega, la vasca, la catalana y la castellana.
O empobina a posiciones, amás de contradictories, cercanes el racismu. Asina, mentantu “Clarín”, nacíu en Zamora, ye pa estos grupos “asturianu por excelencia”, a Carlos Rubiera y al qu´esto escribe acusárenmos de ser zamoranos, pesie a la nuestra nacencia n´Asturies. Porque, nel tracamundiu mental –y ñidiamente, interesáu- d´estes persones, nun importa la nacencia, la xera o cualuquier otro datu oxetivu, tan sólo la identidá colos sos porgüeyos, simpatíes o intereses.
Déxenme, por fin, y aunque cinque a la mio persona, apurrir un exemplu lliteral d´un cartafueyu que s´empondera como l´únicu asturianu por esencia: “Ahí tenemos ejemplos como, (sic) ese X. X. Sánchez Vicente, que no es ni asturiano (sus apellidos son elocuentes), que /permítase, equí escobiar la basura/ encabeza su propio ensalmo astur. / ... / En nuestro periódico y para nuestra Asturias, no hacen falta ni bables ni modernos bablistas, ni ensalmos de esa clase. Somos asturianos hasta tres veces (sic) Fernández, Arangos, Mirandas, Paredes, etc., y defendernos esta tierrina de ensalmos y de abejas bable politiqueras” [14].
Ye curioso qu´estos grupos que tán escontra´l nacionalismu acaben asoleyando la so verdadera mena: un nacionalismu seminal cercanu al racismu y al fascismu.
EL COMPLEXU DE LA SEÑORA´L MEXADERU
Datos y descripción: Asturies ye, ensin dulda, la rexón, xeográficamente falando, d´España onde s´abelluguen mayor númeru de congresos, fundaciones, conceyos, etc., de mena estatal o internacional. Un curtiu repasu ye esti: instituciones permanentes: cursos de la Fundación Ortega y Gasset, Escuela Asturiana de Estudios Hispánicos (más conocío como Cursos de La Granda), alcuentros de xuventú en Cabueñes, Fundación Principáu d´Asturies y los sos premios. Amás d´estos, milenta conceyos ocasionales de toles tribes atopen abellugu nestes tierres: de diseñu, de censores xuraos de cuentes, de mélicos del riñón, d´oncólogos, d´espertos nel agua, de peluqueros, d´espertos en turismu, de flamencológos... cualaquier cosa que proponga venir, equí topa abellugu y perres. Talu como pa la ciudá de Xixón decía´l Director Rexonal de Turismu, podía estendese pa toa Asturies: “Gijón está llamado a ser la ciudad en la que el Gobierno del Principado de Asturias desarrolle grandes proyectos, como las actividades propias de sede de congresos y convenciones”[15].
Desendolcamientu: La mena común de toes estes actividaes ye que nun tienen casi inxamás que ver con Asturies. Asturies nun ye l´oxetu d´estudiu, l´enfotu d´esos congresos y instituciones, sinón el marcu onde s´alluguen, la fonte financiera, parcial o total, de la mayoría d´ellos. Acabaes les xeres, nun queda equí sinón el paranomásicu roíu de factures y fartures, y quiciás de fatures.
Esti sofitu a toes estes atividaes –el sofitu del Principáu o de los ayuntamientos, fechu col dineru los asturianos- asoleya l´ausencia de puxu creatible de los nuestros políticos y instituciones: ná sal d´ellos, ninguna cultura s´anicia equí nin pa equí. Pero, amás, pon a les clares, esa falta de creatividá, de granibilidá, de l´alministración central o de los partíos estatalistes, que-yos marquen, a los subordinaos d´equí, el pensamientu, les competencies y la moda, y, dacuando, pa enriba, la clientela que comién que traigan pal cumplientu de los sos compromisos, esto ye, de los adquiríos por esos partíos en Madrid.
Dende otru puntu vista, el de l´actitú personal de los que sofiten estes xeres, envede entamar ellos daqué creativo o atento al porgüeyu de la so patria, ye talu que podíemos definilu como´l complexu de la señora´l mexaderu. Torgaos p´aniciar cultura, separtaos de la propia, a les nuestres autoridaes –derecha y manzorga estalistes- ye-yos abondu na so miseria diaria con golifar el pasu de les figures estatales y, si acasu, salir na prensa abrazándoles. Eses presencies suplen les sos propies carencies, enllenen la so vanidá. Neto aquella probequina paisanina, empleada nos mexaderos públicos que, cuandu llograba reconocer el pasu de daqué persona importante pelos sos dominios, tenía pa una llarga temporada de finchamientu, como si compartiese la gloria del personaxe sólo col so pasu perillí.
-¿ Sabéis quién tuve ayer ellí? decía a la vegada pudibunda y gayolera a les sos amigues. Ydempués d´un migayu calteniendo´l silenciu asoleyaba:
- ¡Don fulanu de tal!
Y agachaba la cabeza so la taza, saborguiando a la vez el chocolate y la envidia les sos amigues, a les que xixilaba colos párpados enteciarraos mentantu volvía sopelexar, esta vegada, yá sospirando:
- ¡Don fulanu de tal!
Y paecía engrandecese col recuerdu l´arume del pasu del prócer.
[2] Ñidiamente, la cuestión tien una mayor complexidá y enguedeyamientu de los equí espuestos; el mesmu conceptu de “centru” requier, tamién, una desplicación más peñerada, en virtú de la so mesma complexidá. Ensin embargu, talantamos, ye equí suficiente con señalar a ónde apunten los elementos fundamentales.
[3] Ver, pa munchos d´estos datos sobre los qu´equí reblagamos, el mio llibru La cultura popular asturiana: unidá y pluralidá, Uviéu, 1985.
[4] Xeneralmente nun damos equí cites, datos, fechos concretos del emplegu d´estos mitos y de los sos emplegantes. El llector pue atopalos ayures na conversación diaria, y, especialmente, nos medios de comunicación.
[5] Vid. La batalla de Covadonga, n´Esvilla de poesíes na llingua asturiana, páxs. 262-265. Biblioteca Popular Asturiana, Uviéu, 1979.
[6] Datos más peñeraos, nos llugares citaos na nota anterior. El llevantamientu la basílica de Cuadonga pue perbién pescudase como´l símbolu d´esi cumal la construcción del mitu covadonguista.
[7] Yá ye un tema lliterariu en Marirreguera. Albídrese´l comentariu que fago al respetive n´Esvilla de poesíes na llingua asturiana, páxs 60-61. Uviéu 1979.
[8] Ñidiamente Madrid ta ehí como símbolu-resumen de tou un balagar de procesos. Nin s´albidre que ye pa nós palabra máxica, caragada de resonancies o significaciones connotatives de mena negativa.
[9] Argumenta esta xente que´l mesmu nome Asturies ye de “pluralidá”, como si yá nel mesmu nome tuviera enxerta la realidá o la “esencia” de la nuestra tierra.
