Nun llugar de La Mancha qu’el nome ye bien fácil de recordar, dende’l 11 d’agostu pasáu lluz na parede d’ún de los edificios más deterioraos. Quintanar de la Orden presenta asina l’enorme mural col retratu de la Dulcinea más grande del mundu, con 35 metros d’altor.

Fueron les manes de l’artista arxentina de 22 años, Milu Correch, especializada en grafitis, les que que devolvieron el color y la vida a un insulsu ploque de pisos, un mazacote de3 cementu llevantáu nos años 70 baxo l’incomprensible afán de compitir n’altor col imponente campanariu de la ilesia medieval de Quintanar. La ferida urbanística yá sangra menos gracies a esta Dulcinea vanguardista colingada na parede y que resplandez a kilómetros de distancia.

Dende ellí arriba, la enigmática musa d’Alonso Quijano parez velar por Quintanar igual que’l so señor veló les sos armes de caballeru andante na llexendaria venta qu’inda esiste a namás una media llegua del pueblu. Los vecinos anden entusiasmaos col colosal frescu de la so Dulcinea y enséñenlo arguyosos a los visitantes. La reacción ye d’almiración y asombru. Sorprende la revolucionaria apuesta de street art (arte urbanu) aventada dende esti apacible esquinal de la provincia de Toledo, al delláu d’El Toboso, patria chica de la dama imaxinaria del caballeru de la triste figura.

L’artista, fía d’un pintor aficionáu y d’una profesora de lliteratura, tien percorrío Europa interviniendo en diferentes espacios urbanos coles sos obres d’arte de cai. Reside en Buenos Aires, onde sigue creando murales de cai. Agora aguarda la ocasión de tornar a Quintanar pa ver, otra vuelta, a los sos amigos.