Manuel Feliciano esculpe col cincel na llosa de mármol. Ye la segunda llápida que prepara nel día y tien de tar llista pa la tarde, cuando va tener llugar el entierru. El cementeriu del norte de Manila ye’l más grande y más antigüu de Filipines y da de comer a unes 3 mil families que, amás, viven nes 54 hectarees de tarrén del cementeriu. Bien d’ellos viven ellí dende va más de trenta años.

El Día de Tolos Santos enllena d’actividá el llugar. A primer hora del día Feliciano cavó dos tumbes xunto a otros dos trabayadores y más tarde va axudar a la muyer d’él y a los sos fíos na llimpieza de los panteones. Faciendo estos estremaos trabayos, esti home de 49 años consigue mantenese a flote ganando unos 100 pesos diarios (alredor de 1,70€).

Nel cementeriu del norte de la capital fiulipina tan enterraes un millón de persones, ente elles presidentes, artistes y estrelles de cine. Cada selamana hai más d’un cientu d’entierros y el Día de Tolos Santos necesítase más axuda qu’enxamás pa llimpiar los mausoleos, pintar los panteones, etc. La muyer de Feliciano encárgase del curiáu d’unes 15 tumbes al añu.

Bien d’estos trabayos heredáronlos de los padres, que yá son mayores pa estes xeres. Y estos, a la vez, heredáronlo de los sos güelos que tan enterraos nesti mesmu cementeriu. El trabayu, amás, ye duru. Feliciano desentierra coles sos manes los güesos y otros restos mortales. Diz que tovía sigue ensin avezase al golor que surde de les tumbes.