Esti sábadu 2 de payares, a partir de les 18:30 h. entama’l Concursu Cuenca del Caudal nel salón d’actos del Llar de Xubilaos y Pensionistes de Returbiu. 100 cantadores entren a Concursu, lo que significa un aumentu de 40% d’inscripciones con relación al añu anterior. 100 voces que van tener de pasar pel cribu de 7 fases eliminatories, 5 semifinales y 2 finales, p’aportar a finales d’abril del añu entrante a la entrega de premios que, como tolos años, acabará convirtiéndose nuna gran fiesta de la canción asturiana.

Una de les razones d’esti aumentu de les inscripciones achácase a que, esti Concursu, contrata pela primer vez un Xuráu integráu por especialistes en canción asturiana pero que, amás, cuenten con conocimientos musicales. Asina, Xaime Arias, superior en piano y llinguaxe musical, premiu d’ensayu del Principáu d’Asturies nel añu 1998 pol so trabayu L’Asturianada y autor de la biografía de la cantadora Diamantina Rodríguez, conviértese nuna garantía de que la voz va ser valorada convenientemente dende’l planu musical más que dende’l planu de la imitación de les grandes voces del pasáu. Dalgo no que tamién van participar los otros dos miembros del Xuráu, el prestixosu cantador y maestru Luis Estrada y la gran estrella de la tonada moza asturiana, Anabel Santiago.

Nesta primera eliminatoria van participar 12 cantadores, les voces femenines d’Águeda Riera, María Llatores y la veterana María Teresa González Soto, y les masculines d’Andrés Cueli, flamante campeón de la última edición, xunto a Isaac Sierra, tercer clasificáu, y Tino Braña, Javier Toral, José Tronco, Manuel Roza, Manuel Collado, Manuel Jesús Gómez y José García Muñiz.