“La CBS presenta a Orson Welles y a Teatru Mercury del Aire en La Guerra de les Galaxies, de H.G. Well”. Asina entamó, va 75 años, con esta cenciella presentación como única alvertencia, la hestórica tresmisión que semó’l pánicu en Nueva York y en bona parte de los Estaos Xuníos al llevar a milenta persones de tolos estaos a creer que los invadíen los marcianos.
Welles escoyó la novela de 1989 como tema de la so tresmisión del día de Halloween. Amás d’adaptar a un entornu más local la hestoria, que nel llibru ocurría en Surrey y en Londres, el realizador escoyó da-y a la primer parte del relatu l’apariencia sonora d’un noticieru con información del últimu minutu. Los que sintieron la emisión dende l’empiezu sabíen que se trataba d’una dramatización, pero los qu’aportaron a ella un poco depués, anque fuera un par de minutos, dieron con un programa de música interrumpíu con frecuencia por boletines informativos que desembocaron nel relatu en vico de l’arrivada d’un exércitu invasor del planeta roxu a Grovers Mill, New Jersey.
El New York Times, na so edición del 31 d’ochobre, relató les escenes d’alarma baxo esti titular en primera páxina: “Radioyentes en pánicu tomen guerra de novela como real”. El Times describe como la tresmisión “alteró a families, interrumpió servicios relixosos, creó embotellamientos y colapsó los servicios de comunicaciones”. Anotaba, arriendes, que “si bien Orson Welles solía asustar a abondos neños col so personaxe de La Sombra, esta vez unvió a una multitú d’adultos a les sales d’emerxencies”.
Nos momentos más dramáticos del programa, el reporteru Carl Phillips, unviáu especial, relataba con medráu pánicu como un obxetu que se creyía yera un meteoritu resultaba ser una nave de la qu’emerxíen seres armaos con rayos de calor. “Dames y caballeros, esto ye los más aterraor qu’enxamás presenciara”, exclamaba’l corresponsal. Poco depués, la tresmisión interrúmpese d’esmenu y el locutor principal comunica a l’audiencia que’l cuerpu calcináu de Phillips fuera identificáu nun hospital local.
