Irónicu y sat´ricu, un videu realizáu por tres homes saudíes pa denunciar la prohibición a les muyeres de ponese al volante d’un coche y poder conducir causa sensación n’internet y convirtióse en viral. Un millón de persones viéronlu nes primeres 24 hores y güei yá superaba lo 6 millones de visites: http://www.youtube.com/watch?v=aZMbTFNp4wI.

El llamativu videu fai burlla de la prohibición de conducir que reina n’Arabia Saudí pa les muyeres cantando una reversionada “No woman, no cry”,m del llexendariu Bob Marley, por “Non woman, no drive” (Non muyer, nun conduzas). El tema qu’inspira’l videu nun ye nin nuevu, nin graciosu, nin muncho menos. La llucha de muyeres saudíes que reclamen polos sos derechos a que les dexen ponese al volante del coche data de va enforma. Icluso’l sábadu pasáu, día nel que fuera subíu a la web el videu, realizárase una xornada de protesta.

Con esti divertíu videu llogróse lo qu’enxamás enantes se consiguiera, que l’asuntu trescienda fronteres y tenga masividá. La grabación ye obra del humorista y activista social Hisham Fageeh, en collaboración col cómicu Fahad Albutairi y el músicu Alaa Wardi. “Hermanina, nun toques el volante. Les reines nun conducen, pero pues faceme la cena que voi compartir contigo”, canta Fageed demientres los sos collaboradores lu acompañen con palmes y xiblíos. “Los tos pies son l’únicu mediu tuyu de tresporte, pero namás dientro casa y dígolo en serio”, sigue cantando.

El cantante bromea col argumentu qu’esgrimen les autoridaes d’Arabia Saudí: les muyeres nun puen conducir porque cuerren el riesgu de llesionase los ovarios y tener fíos con problemes clínicos.