Un home de 35 años d’edá morrió esti sábadu pela mañana como consecuencia d’un accidente de caza ocurríu nel términu del conceyu d’Artana, na provincia de Castellón. La víctima recibió un disparu d’otru cazador de forma accidental de la que los dos participaben nuna batida de xabaril na xerra d’Espadán, según informaron fontes de la Guardia Civil.

Los fechos ocurrieron depués de les diez de la mañana en circunstancies qu’investiga la Guardia Civil. El teléfonu d’emerxencies recibió l’avisu a les 10:23h. D’esmenu, el Centru de Coordinación d’Emerxencies de la Generalitat movilizó a la Guardia Civil, los bomberos y el SAMU. Cuando los sanitarios aportaron al llugar, el cazador yá falleciera. Tamién acudiera con urxencia el Grupu Rescate ya Intervención de Montaña de la Guardia Civil y un helicópteru del institutu armáu pa sacar el cadáver del abruptu paraxe.

Tres de les primeres investigaciones, la Guardia Civil imputó al autor del disparu mortal, un home de 54 años, por un delitu d’homicidiu imprudente. Los axentes intervinieron la escopeta de caza y depués dexáronlu en llibertá.

Va años qu’accidentes asina viene teniendo llugar en diferentes partes d’España durante’l trescursu de batíes de caza. El casu más sorprendente tuvo llugar años atrás cuando un home que taba apoyáu na escopeta cargada, disparóse-y cuando’l perru se-y echó encima pa saludalu.