L’alcuerdu secretu Cinco Güeyos (Five Eyes), pol que cinco potencies anglófones comparten información d’intelixencia y nun se vixilen ente elles, podría extendese p’apaciguar a los aliaos europeos, escandalizaos poles revelaciones del espionaxe estadounidense. L’últimu en suxerir esta vía nos Estaos Xuníos fue una autoridá na materia, el diplomáticu John Negroponte, que fuera’l primer director de la intelixencia nacional estadounidense (DNI) ente 2005 y 2007, baxo la presidencia del republicanu George W. Bush y vicesecretariu d’Estáu hasta 2009.

Nuna entrevista a la cadena CNN, Negroponte reconoción que les revelaciones del ex analista de l’Axencia Nacional de Seguridá (NSA) Edward Snowden tan causando un grave dañu a los Estaos Xuníos y que’l Gobiernu tendría de considerar extender el tipu d’arreglu especial que washington tien dende va décades colos sos aliaos más estrechos. Negroponte menciona en particular l’alcuerdu Cinco Güeyos, un pactu secretu que data de la Guerra Fría y que vincula a los Estaos Xuníos, el Reinu Xuníu, Canadá, Australia y Nueva Zelanda, les cinco potencies angflófones que combatieron escontra l’Alemaña nazi.

L’alcuerdu conecta les redes d’intelixencia de los Cinco Güeyos, lo que permite a “los países más democráticos”, según expresión del propiu Negroponte, compartir información ultrasecreta y, más que nada, previén l’espionaxe ente ellos. La suxerencia del diplomáticu estadounidense prodúxose malapenes unes hores depués de que concluyera en Bruxelles una cume de la Xunión Europea na que los gobernantes del bloque, miembros na so más grande parte de la OTAN, mostráronse al unísonu indignaos poles revelaciones de que los servicios secretos d’intelixencia de Washington pincharan incluso los teléfonos móviles de bien d’ellos.