Buell Wesley Frazier sigue insistiendo, 50 años depués, que nun notara nada raro en Lee Harvey Oswald de la que lu recoyera en coche pa dir al trabayu’l 22 de payares de 1963.  L’orbayu, la música y les notiocies de la radio y unes poques palabres cruzaes, ye tolos que recuerda d’aquella mañana con Oswald de copilotu camín del trabayu nos venti minutos que pasaron xuntos unes hores enantes de que’l prewsidente de los Estaos Xuníos, John F. Kennedy, fuera achuquináu de la que’l so descapotable pasaba pela plaza Dealey de Dallas (Texas).

La conclusión de que los disparon procedíen del sextu pisu del Depósitu de Llibros Escolares de Texas, onde Oswald y Frazier trabayaben, y el posterior arrestu y asesinatu del primeru sescudieron la vida de Frazier, que con 19 años convirtióse en sospechosu y más tarde en testigu de la hestórica investigación.

Frazier nun sabía enforma de la vida d’Oswald. Les contaes ocasiones nes que lu recoyera na casa de la so esposa Marina, la vecina d’él na llocalidá d’Irving (Texas) y lu llevaba a trabayar, pasaben la más grande parte del trayectu sintiendo la radio. Con too, dambos cimentaran una relación d’aprendiz y maestru nel trabayu, onde se conocieron el 15 d’ochobre de 1963, depués de que Frazier recibiera órdenes d’aprender a Oswald, acabante d’entrar na empresa.

Frazier nun se decanta por una teoría en concreto de les munches qu’inda cuestionen l’autoría d’Oswald, perod s’alcuentra ente los que, mediu sieglu depués, cuiden que l’asesinatu fue parte d’una conspiración. L’asesinatu afectó directamente a Frazier, qu’esa mañana llevara en coche’l paquete nel que supuestamente Oswald ocultó’l rifle que diba utilizar pa matar a Kennedy. Frazier, que nun diera mayor importancia al paquete cuando Oswald-y explicó que yeren unes barres de cortina pal so nuevu cuartu, fue deteníu’l mesmu vienres pela tarde ya interrogáu pola policía de Dallas hasta la mañana del sábadu, cuando lu dexaron marchar tres de superar una preba de polígrafu.

Frazier nun tardó en ser convocáu pola Comisión Warren, onde frustró a los congresistes al declarar que’l paquete qu’Oswald llevó nel so coche nun yera lo suficientemente llargo pa contener un rifle de 89 centímetros.