El presidente venezolanu, Nicolás Maduro, anunció esti xueves la creación d’un nuevu departamentu, el Viceministeriu pa la Suprema Felicidá Social del pueblu venezolanu, que se va encargar de coordinar les más de 30 misiones sociales que se crearon nel país dende la llegada al poder del ex presidente Hugo Chávez.

Según explidó’l mandatariu, llamó asina al nuevu departamentu “n’honor al comandante Chávez y a Bolívar”. El nuevu Viceministeriu va encargase de la “coordinación de les misiones y grandes misiones presidenciales, que va tener l’obxetivu de la suprema felicidá social”, precidó durante un discursu nel Palaciu de Miraflores.

Maduro indicó que’l nuevu departamentu va encargase de les distintes desixencies, reclamos y necesidaes de la población y la so incorporación a les misiones “y d’atender a los vieyinos y vieyines, y neños y neñes, que son los más sublime y amáu del pueblu revolucionariu”. Al frente del Viceministeriu va tar l’ex diputáu Rafael Ríos y va contar col respaldu del doctor Julio César Álvarez, mídicu de Chávez nel pasáu, y del tamién doctor Absalón Méndez, expertu en seguridá social.

L’obxetivu ye qu’a partir d’agora al frente de les misiones “haya un responsable claru y una cabeza visible que nos informen en tiempu real de cómo marcha cada una d’elles” porque, sorrayó, “estes misiones tenemos de llevales hasta’l cielu, esi ye’l nuestru agradecimientu a Chávez”.