Esti fin de selmana va final l’horariu de branu y los reloxes van retrasase una hora’l domingu, 28 d’ochobre, de manera qu’a les 3:00 van volver ser les 2:00, polo qu’oficialmente va haber una hora más, en cumplimientu de la Directiva Europea que rixe’l denomináu cambiu d’hora y qu’afacta a tolos Estaos miembru de la Xunión Europea.

La práctica d’atrasar el reló una hora n’iviernu y adelantalu en branu xeneralizóse de forma desigual en 1974, al producise la primer crisis del petroleu, colo que dellos países decidieron adelantar los sos reloxes pa poder aprovechar meyor la lluz del sol y, poro, consumir menos ellectricidá n’illuminación. Aplícase como directiva dende 1981 y renovóse sucesivamente cada cuatro años, según recuerda’l Ministeriu d’Industria, Enerxía y Turismu.

Dende l’aprobación de la Novena Directiva, pl Parlamente Européu y Conseyu de la Xunión, en xineru de 2001, esti cambiu aplícase con carácter indefiníu. Esta Directiva ta incorporada al ordenamientu xurídicu español por Real Decretu 236/2002, de 1 de marzu. Asina, el carácter permanente de la novena directiva establez que l’empiezu de la hora de branu –cuando s’adelanta’l reló una hora- entama l’últimu domingu del mes de marzu y fina cuando se retrasa una hora l’últimu domingu d’ochobre.

L’aprobación d’esta directiva ta avalada poles conclusiones d’un estudiu soble l’alcance y efectos, realizáu por encargu de la Comisión Europea y presentáu al Parlamentu en 1999. L’estudiu conclúi que’l cambiu horariu tien impactos positivos non solo sobre l’aforru sinon sobre otros sectores como’l tresporte, les comunicaciones, la seguridá vital, les condiciones de trabayu y los modos de vida, la salú, el turismu y l’ociu.