El Gobiernu alemán dio por válides les informaciones qu’apunten que los Estaos Xuníos pinchó’l teléfonu móvil de la canciller Angela Merkel, criticó bien duro l’espionaxe ente aliaos y desixó a Washington una explicación exhaustiva y sincera. La propia xefa del Gobiernu alemán, que s’alcuentra en Bruxelles pa una cume europea informal, sorrayó que “l’espionaxe ente amigos nun pue dase n’absolutu” yá que mina los llazos billaterales y dexó la pelota nel teyáu estadounidense. “Necesitamos confianza ente amigos y aliaos y agora tien de reconstruyise de nuevo esa confianza, agregó Merkel, tanteando esi repunte de la crisis del espionaxe con especial procuru, pero dando tácitamente por sentao que’l so teléfonu taba interveníu polos servicios secretos estadounidenses.

Pela so parte, el ministru alemán d’Exteriores, Guido Westerwelle, axuntóse d’urxencia col embaxador estadounidense en Berlín, John B. Emerson. Esta convocatoria supoón un pasu diplomáticu inéditu na hestoria alemana de la posguerra. Al so xuiciu, Washington tien de dar una explicación seria y ensin vacios, amás de sincera y exhaustiva, sobre les actividaes de siguimientu n’Alemaña.

D’esta forma, el titular en funciones d’Exteriores englobó non solo l’últimu capítulu d’esti escándalu, sinon tamién les captaciuones masives de comunicaciones que presuntamente llevó al acabu durante años l’espionaxe de los Estaos Xuníos n’Alemaña y que salieron a la lluz el pasáu xunetu por mor de les filtraciones del ex analista de l’Axencia Nacional de Seguridá, Edward Snowden.