Un xulgáu madrilanu vien de dictar sentencia escontra l’aerollinia irlandesa Ryanair y anuló ocho de les sos cláusules por considerales abusives, depués de que la organización de Consumidores y Usuarios (OCU) entamara acciones llegales escontra la compañía de baxu costu. El xulgáu determinó que diches cláusules violen la llexislación de protección a los consumidores, según informó la OCU nun comunicáu, polo qu’ordena a Ryanair que les retire de los sos contratos y dexe d’aplicales.

D’alcuerdu cola sentencia, la compañía va tener qu’almitir a partir d’agora documentos como’l llibru familia pa los viaxeros menores d’edá, dalgo que nun ocurría hasta’l momentu y que tien provocao graves problemes a apsaxeros que veíen como se-yos negaba’l pasu na puerta embarque.

Tamién entienden desproporcionáu’l cobru de 40 euros pola impresión de la tarxeta d’embarque; prohibe que se puea denegar l’embarque ensin motivu y qu’impida tresportar determinaos obxetos; anula la obligación de pagar con tarxetes de créitu y que se cobre un importe por recoyer tarde la maleta, asina como que la compañía puea modificar unillateralmente los horarios. Amás, Ryanair nun va poder desixir a los pasaxeros que presenten les sos demandes xudiciales n’Irlanda, como ocurría hasta agora.

Según aseguró la OCU, Ryanair ye una de les aerollinies que provoca un más grande númberu de reclamaciones.