La llíder del Frente Nacional (FN) en Francia, Marine le Pen, prepárase pa entamar un grupu políticu européu na futura Eurocámara y, en declaraciones feches nesti miércoles nuna conferencia nel Parlamente Ruropéu d’Estrasburgu, fala qu’espera contactar aína con dalgún partíu políticu n’España yá que, según ella, pel momentu nun tienen establecíu nengún contactu con nengún movimientu “patrióticu” n’España.

Le Pen nun descartó ser la presidente d’una futura formación que va llamase Alianza Europea pola Llibertá y que pretende conformase tres de la nueva Eurocámara que tien de surdir de les elecciones al Parlamentu Européu en mayu de 2014. Pa la creación d’un grupu parlamentariu propiu nel Parlamentu son mester 25 eurodiputaos de 7 nacionalidaes. La llíder ultraderechista abrió yá la puerta al Vlaams Belang holandés, a la N-VA en Flandes y al movimientu suecu Sverigedemokraterna, ente otros. Le pen señaló que’l futuru grupu parlamentariu tien l’obxetivu de “devolver la soberanía al pueblu européu”.

Renegó de la etiqueta d’extrema derecha. “Somos patriotes y nada nel nuestru proxectu políticu ye extremista. Los que nos ponen la etiqueta d’extrema derecha son los nuestros rivales políticos”, agregó la fía del conocíu parlamentariu ultraderechista Jean.Marie Le Pen. Ello ye que, na llinia del pensamientu neo-fascista cuida que los grandes partíos europeos seyan “incapaces de controlar los fluxos masivos d’inmigración a Europa”, asina como “la explosión del desempléu”.