La imaxen de Bran Mak Morn ye la d’un guerreru brengosu. Pelu prietu y llargu, xestu adustu, siempre cola mano empuñando una espada dispuesta al ataque. Nada que ver cola d’Abraracúrcix, que va muncho dexó los tiempos heróicos d’Alesia y agora disfruta d’una amplia panza que lu fai ser inda más buenón de lo que ye. L’escudu d’él, más que para la so protección, utilízalu como mediu de tresporte.

“Astérix y los pictos” sal a la venta mañana y, como pasa dende va años, la so publicación va realizase a escala mundial; tan solo en Francia, paraísu del cómic, van tirase dos millones d’exemplares d’esti tebéu.

Diba pa ocho años qu’Astérix nun protagonizaba una nueva hestoria. Lo cierto ye que los sos siguidores agradecíenlo. “El cielo se nos cae encima”, el so trixésimutercer álbum, llogró un co0mentariu unánime de crítica y públicu: horrorosu. Un auténticu fracasu de guión que, dende la muerte de Goscinny, taba nes manes d’Uderzo, el diduxante de l’aldea gala. Tala vez por esti fracasu y pola so elevada edá, Albert Uderzo decidió ceder los preseos y a Astérix a un nuevu equipu de guionistes y dibuxantes.

El papel nun yera cenciellu. Dende que nacieran en 1959 vendiéranse nel mundu enteru alredor de 350 millones d’exemplares de les aventures d’Astérix y Obélix, traducía a más d’un cientu de llingües, ente elles l’asturianu; arriendes de protagonista de bien de películes, en dibuxos y en carne y güesu, amás d’impulsar un parque d’atracciones. En definitiva, una mina d’oru que nun se podía poner en peligru, una vez decidida la cesión de pinceles y de la pluma, dexándolo a autores que pudieran dar un cambiu radical a los personaxes.