Albacete.- L’acusada ellaboraba anuncios fraudulentos de muyeres qu’ufiertaben servicios sexuales y, pa ello, usó fotografíes de prostitutes, ensin qu’estes lo supieran, ocultába-yos la cara y facía montaxes informáticos pa usar estes imáxenes nos anuncios que publicaba n’internet.

Contrató a varies persones pa publicar los anuncios en diferentes páxines web y contrató a diferentes moces pa que constestaran, como operadores telefonistes, a les llamaes que l’acusada recibía dende estremaos puntos d’España respondiendo a los anuncios de contactu.

Les telefonistes usaben el sistema de dos llames pa falar colos clientes, que contactaben dende diversos puntos d’España. Durante la primera llamada, la telefonista atendía como si fuera ella la prostituta y preguntaba al cliente en qué ciudá s’alcontraba y lu informaba de los servicios sexuales, el preciu de los mesmos –qu’oscilaben ente los 50 y los 150€- ya incluso-yos ufiertaba una casa.

Asinamesmo, les telefonistes indicaben a los clientes que, por razones de seguridá deberíen facer el pagu del serviciu con carácter previu, pa lo que debíen de dirixise a un determináu caxeru automáticu ya ingresar l’importe del serviciu seleccionáu. Concluíen informándolu de que, realizada la tresferencia, la moza contratada diba llegar a la puerta’l caxeru y diba recoyer al cliente.

Namás el cliente pagaba, telefoneaba de nuevo ya indicába-y el domiciliu al que tenía d’acudir pa mantener la relación sexual. Como’l númberu quedaba rexistráu nos teléfonos móviles de les operadores, si’l cliente llamaba pa quexase de que nun apareciera la prostituta y reclamar el dineru, la so llamada nun yera contestada y, asina, el cliente quedaba ensin dineru y ensin cita.

Una vez descubierta la rede con sé n’Albacete, esti martes la Sección Primera de l’Audiencia Provincial d’Albacete tien previsto cellebrar el xuiciu contra l’acusada por un presuntu delitu d’estafa a 900 clientes con ficticios servicios sexuales, fechos polos que la Fiscalía pide pa ella una pena de seis años de prisión y una multa de poco más de cinco mil euros. La policía estima que l’importe total de lo defraudao a los clientes supera los 60 mil euros.