El ministru de Facienda y Alministraciones Públiques, Cristóbal Montoro, anunció que los fi¡uncionarios van recuperar dalgún de los sos díes de llibre disposición (conocíos como “moscosos”) y que se van meyorar les sos condiciones llaborales en cuanto al saneamientu de les finances públiques lo permita.

Na so defensa del proyectu de presupuestos pa 2014 frente a les onde enmiendes a la totalidá presentaes, Montoro agradeción públicamente a los funcionarios el so esfuerzu y el so gran serviciu a España y a la recuperación económica. Treslladó-yos la confianza y la seguridá de que’l Gobiernu –que volvió a conxelar los sos salarios en 2014- va meyorar les sos condiciones llaborales “nel momentu nel que les condiciones presupuestaries lo permitan”.

A esti respectu, “la primer intención del Gobiernu ye recuperar dellos de los díes de llibre disposición nel momentu nel que’l saneamientu de les finances públiques del conxuntu de les alministraciones asina lo permita”, dixo. El ministru recordó qu’esti collectivu “col so trabayu diariu y el so afán cotidianu asegura la provisión d’unos servicios públicos de los que depende’l bienestar del conxuntu de los españoles”.

Amás de la conxelación salarial, en xunetu de 2012 suprimiéronse tres de los seis díes de llibre disposición colos que contaben los funcionarios, los conocíos como “moscosos”, y eliminóse la so paga de navidá esi añu.