París.- El presidente francés, François Hollande, fue dafecho criticáu esti domingu por ofrecer tornar a Francia a una neña inmigrante deportada pero ensin la familia d’ella. Una encuesta amosaba que’l so índiz d’aprobación llegara a un mínimu hestóricu.

Hollande entró na disputa cuando ofreció a Leonarda Dibrani, una adolescente d’orixen xitanu que fuera detenida nun autobús escolar y deportada a Kosovo, la posibilidá de tornar a Francia a finar los sos estudios, pero namás si lo facía sola, ensin los sos padres y hermanos.

La propuesta fue condenada dende varios sectores, Dibrani incluyida, que dixo que nun diba tornar sola, exponiendo a Hollande a nuevos ataques al so llideralgu. Asina, la expulsión de Dibrani depués de que la familia d’ella nun llograra obtener l’asilu políticu punxo a preba la capacidá d’Hollande de lidiar col asuntu de la inmigración illegal, un asuntu que cada vez más ye fonte d’una más grande frustración en Francia.

Grupos d’estudiantes protestaron pa demandar que la moza de 15 años fuera readmitida, anque les encuestes d’opinión amuesen que la más grande parte de los franceses quieren a la familia fuera de Francia. Dellos opositores de la UMP, de centruderecha, acusaron a Hollande de tar tan obsesionáu con satisfacer a la base de votantes socilaistes que traicionó la voluntá de los ciudadanos.