Uviéu.-El primer Congresu de Cultura Asturiana Mozo 2013 vien de cellebrase nel Auditoriu Príncipe Felipe d’Uviéu, un puntu d’alcuentru ente los estremaos integrantes del mundu de la cultura asturiana rellacionaos colos medios de comunicación, la lliteratura, la música o la xestión cultural. Fue organzái pola Fundación Nueva Asturies y L’Arribada.

Un congresu que surde con espíritu reivindicador de la falta de visibilidá de la cultura asturiana, alredor de la que, según datos expuestos nel propiu alcuentru, se mueven unes 5 mil persones na nuestra comunidá.

Presentáu oficialmente por la directora xeneral de Política Llingüística, Ana María Fueto, y por Xuan Xosé Sánchez Vicente, autoridá dambes del mundu de la cultura asturiana del tiempu de la Transición, pol Congresu tamién pasaron delles interesantes intervenciones y reflexones, como les de la escritora Laura Marcos, el productor musical Pablo Quiroga, el gaiteru Bras Rodrigo o’l periodista Naciu Varillas.

Esta reivindicación surde nun momentu nel que l’ayudes per parte de los ayuntamientos y la propia Conseyería de Cultura baxaron a niveles ridículos. Dalgo que se notó, pa munchos excesivamente, nel ras xeneral de les reivindicaciones. En concreto Blas Rodrigo faló de la enorme fuerza de les bandes de gaites nel momentu actual asturianu, con too y nun existiur nenguna subvención específica a lo llargo d’estos años pal fomentu d’esta parte tan visible de la cultura asturiana.

Retayu del discursu d'apertura'l Congresu de Cultura Asturiana Mozo, por Xuan Xosé Sánchez Vicente

Fai aprosimadamente un mes, na presentación d’un llibru de Xuan Santori, Lluis Xabel Álvarez, presente nel actu, alvertíame de que nel 2014, nel añu que vien, van cumplise 40 años del surdimientu de Conceyu Bable y de l’apaición, polo tanto, del Surdimientu.

            Esti Congresu nun se convocó inxamás pensando nesa circusntancia hestórica, que nin siquier taba presente na concencia de los convocantes. Pero, ensin embargu, esa consideranza nun ye una mala ocasión pa facer una reflesión.

            Dende aquella fecha fasta güei, 19 d’ochobre de 2013, el panorama de la cultura asturiana camudó radicalmente. Lo que quedaba de les nuestres señes d’identidá, una especie de zalegu del nuestru devenir hestóricu, nun yera más qu’una serie de costumes y d’actos teñíos de ruralismu, de vulgaridá; presentes delantre la sociedá como los rasgos d’agonía d’una historia que daba les aboquiaes y que nun podía tener continuidá nel futuru. Y, lo que ye peor, toes aquelles costumes y actos, toos aquellos rasgos identitarios, nun teníen cultivadores enfotaos nellos, y, si los teníen, yeren más una especie de románticos caltenedores d’un pasáu semimuertu que cultivadores d’un presente que se proyectase con puxu y calter valiosu hacia’l futuru.