Esti sábadu 19 d’ochobre entama la 20ª edición del Concursu de la Cancón de les Mines de La Nueva de Llangréu, depués de que’l xueves pasáu se ficiera una presentación a los medios de comunicación cola intervención del gaiteru oficial, Valentín Fuente, y l’actuación del Coro Santiaguín. Esta presentación a los medios sirvió, igualmente, pa presentar a los cantadores de tonada y les autoridaes presentes, el tren mineru del ecomuséu del Valle de Samuño.

La presentación oficial d’esti sábadu va contar cola presencia de la campeona de les modalidaes femenina y de la canción del emigrante, Marisa Valle Roso, del tamién doble campeón de la modalidá masculina y de la canción minera n’homes, Andrés Cueli, del campeón de aficionaos, Adolfo Uría, del campeón de xóvenes, Raúl Díaz, de la campeona de la canción minera en muyeres, Liliana Castañón, del campeón de la canción minera n’aficionaos, Pablo Díaz, del campeón de canción ayerana, José Tronco, y del campeón de la modalidá de gaita, Álvaro Álvarez. Tamién van actuar, abriendo esti actu de presentación, la pareya de gaita y tambor, Sergio y Hugo Trapiello.

L’actu de presentación d’esti Concursu de la Canción de les Mines, el más importante y antigüu de los que se cellebren nel Valle del Nalón, va grabase pol programa Sones de Tpa pa emitise’l domingu 27. A lo llargo del programa entrevistaráse al director del Concursu, Francisco Torre, y a l’alcaldesa de Llangréu, María Álvarez, con motivu d’esti vixésimu aniversariu.