Xixón.-El conseyu d’alministración del Teatru Xovellanos va xuntase’l vienres que vien p’aprobar la suspensión de l’actuación del cantautor Albert Pla que taba prevista pal 25 d’ochobre.

L’equipu de gobiernu del Ayuntamientu de Xixón, del Foro, va plantear que se suspendda’l conciertu depués de que’l Grupu Popular solicitara la rescisión del contratu firmáu pol artista, según les sos palabres “por insultar gratuitamente a los xixones” nuna entrevista concedida al diariu La Nueva España.

Les polémiques declaraciones, na llinia de les que siempre fai’l cantautor nos sos conciertos y previo a ellos, y que recoyía güei’l diariu dicíen: “A mi siempre me dio ascu ser español, como espero que a tol mundu. Prestaríame que los catalanes fuéramos independientes y qu’en Xixón s’estudiara’l catalán por coyones, igual que nos pasa a nosotros agora”.

El conceyal del PP, Francisco Rodríguez Cubiella, que nun entiende’l doble sentíu y la ironía d’estes declaraciones fácilmente reconocibles por toos aquellos que siguen la traxectoria del cantautor catalán, señala nel so comunicáu que les manifestaciones “son un grave insultu que nun tien de quedar ensin respuesta” y que, al so xuiciu, “nun ye de recibu” qu’un teatru municipal que paguen “tolos ciudadanos dea cabida a l’actuación de dalguién que demuestra una absoluta falta de respetu hacia los xixoneses y españoles”.

FOTO: MANIFESTACION. Nou espectacle de ALBERT PLA. Fotografia FERRAN SENDRA