El nuevu modelu de financiamientu autonómicu va perxudicar a Asturies, según afirmó güei el senador d'IX, Jesús Iglesias, pa quien les prieses del PP pa modificar el sistema actual respuende a lo que denominó “carajal” internu d'esti partíu.

“El modelu anterior al que tenemos nestos momentos, yera más favorable p'Asturies. Ye de tarrecer y tou indica, pola correlación de fuerces qu'un nuevu modelu de financiamientu perxudique a esta Comunidá Autónoma”. Iglesias abogó porque'l nuevu sistema tenga en cuenta les particularidaes del Principáu, dando prioridá a los derechos de les persones sobre los territorios. otra cosa, dixo, sería una estafa pa la ciudadanía. El nuevu modelu, reclamó, tendrá de tener en cuenta qu'emprestar servicios públicos n'Asturies ye más caro que n'otres zones, pol avieyamientu, porque hai zones poco poblaes, pero que los sos ciudadanos tienen tamién derechu a esos servicios, o pola orografía. “Too eso ha ser tomao en cuenta o, si non, tarán estafándonos a los asturianos”

Pal parllamentariu, l'acelerón del Partíu Popular a la reforma trata de dar respuesta a les esixencies de les autonomíes más rabelisques gobernaes pol PP. “Per un sitiu el PP de Cataluña pide un tratu estremáu pa esa Comunidá Autónoma; el PP de Madrid esixe que s'amenorgue la so aportación a la solidaridá y a too ello Rajoy respuende cola trampa repitida de les balances fiscales”. Y ye que, esplicó Iglesias, eses cifres dan solo una visión parcial de la realidá de cada territoriu. “Les balances fiscales que yá fueron publicaes por Zapatero son una semeya incompleta, son una semeya que, amás, reflexa una realidá falsa. En primer llugar la resultancia depende del criteriu que s'aplique pa calculales; de segundes, solo mide los fluxos públicos non los privaos”.

N'Asturies, si se tienen en cuenta esos fluxos privaos habría que tener en cuenta los cambeos non solo de la crisis sinón de la reforma del sistema financieru. El senador aludió nesti casu al bancu Herrero, absorbíu por una entidá catalana o a la bancarización de Cajastur, que supunxo esleir la firma y tamién la so cartera de participaciones industriales, con una baxada nes posibilidaes reales d'influencia de la Comunidá Autónoma nes estratexes empresariales nes que participaba al traviés del accionariaáu.

Tampoco los fluxos públicos esclarien nada señaló Iglesias: “Cataluña y Madrid pueden tener agora escases inversiones n'infraestructures –nun ye cierto pero por qué, porque antes yá tuvieron eses inversiones. N'Asturies yá casi damos de cierto que l'alta velocidá va quedase en Llión. Les cuatro capitales catalanes tán conectaes por alta velocidá. Madrid tien una completísima rede radial d'autopistes que se pagaron nel so día y que vamos tener que volver pagar porque los concesionarios tán en quiebra. Asturies nun tien nada d'eso, va tener una parte y dirá a tenelo muncho más tarde que lo tuvieron estes Comunidaes Autónomes”.

Pa Iglesias, cuérrese'l riesgu de que s'aluda al altu pesu de les pensiones daqué, al so xuiciu, que tien de ser rebatío: “Hai que recordar que si n'Asturies tenemos pensionistes, munchos, ye porque antes tuvimos munchos trabayadores. Trabayadores que trabayaron pal conxuntu del desenvolvimientu del Estáu Español. Equí anicióse industria pesao onde esos trabayadores desenvolvieron la so actividá con terribles impactos nel mediu ambiente y na salú de munchos d'ellos, que fueron imprescindibles pal desenvolvimientu del conxuntu del Estáu. Eso tampoco lo miden les balances fiscales”.

Al respective de la posibilidá d'algamar un alcuerdu ente tolos partíos asturianos pa defender los intereses autonómicos, Jesús Iglesias, amosóse escépticu yá que, dixo, pa ello'l PP asturianu tendría que llantar cara daqué que, al so xuiciu, paez improbable.