La policía española ta acabante de desarticular en Canaries una rede de prostitución qu’explotaba principalmente a muyeres nixerianes a les qu’obligaba a tener fíos col aquel de manteneles más controlaes. Na operación fueron deteníos na localidá de Vecindario, na islla de Gran Canaria, a la cabeza de la rede xenta’l so maríu y otros dos collaboradores, informó esti martes la policía nun comunicáu.

La organización trelladaba a les sos víctimes dende Nixeria a España pasando per Marruecos, país nel que podíen permanecer hasta dos años. “Ye en Marruecos onde les muyeres teníen de quedar embaranzaes pa poder asina cumplir col últimu requisitu desixíu pola organización pa poder viaxar hasta Europa: les sos víctimes teníen de ser muyeres embaranzaes o con fíos pequeños”, según informa la mesma fonte.

Dende Marruecos, les muyeres vaiaxaben de manera illegal a España al traviés del estrechu de Xibraltar en precaries embarcaciones, polo que finaben ingresaes en centros d’internamientu d’extranxeros nel sur d’España. Al salir d’estos centros, la rede treslladábales n’avión a Canaries.

Una vez en Canaries, les muyeres yeren obligaes a prostituyise pa pagar la supuesta delda que contraxeran cola rede pa traeles a España, que podía ascender hasta los 30 mil euros, según la mesma fonte. Pa mantener controlaes a les sos víctimes, los sos fíos quedaben al cargu del maríu de la cabeza de la organización. La operación, que culminó cola detención de los cuatro miembros de la rede entamara a trabayar en febreru pasáu.