Moscú.- La policía detuvo güei a 1.200 persones nun ampliu operativu encontra inmigrantes illegales en Moscú, un día depués de los disturbios xenófobos que dexaron 23 feríos pol asesinatu d’un xoven rusu.

La policía rusa realizó les detenciones nun mercáu mayorista del suburbiu de Biriulovo, al sur de la capital, nonde trabayen mayoritariamente inmigrantes de países del Cáucasu y d’Asia Central. La operación, según analistes, busca tranquilizar los ánimos tres de los disturbios encabezaos por radicales de derecha que destrozaron un mercáu alministráu por inmigrantes como represalia tres del asesinatu d’un xoven rusu y que fuera cometíu por un home del Cáucasu, según los indicios.

Los habitantes de la zona desixeron el pieslle del mercáu, que fue tamién rexistráu poles autoridaes de control d’alimentos. La policía ufrió una recompensa de 23 mil euros por cualaquier pista sobre l’asesinatu del xoven de 25 años, Yegos Sherbakov, apuñaláu al alborecer del xueves al intentar protexer a la moza de sufrir un acosu.

Nel pasáu produxéronse de contono enfrentamientos ente nacionalistes radicales rusos ya inmigrantes. N’avientu de 2010 unos 5 mil extremistes de derecha y hoolingans entamaron una acción de “caza del inmigrante” cerca de la famosa Plaza Roxa depués de qu’un fanáticu morriera durante una engarraza con un home d’orixen caucásicu.