Ciudá del Vaticanu.- “Nos llugares nos que se tomen decisiones importantes ye necesario’l xeniu femenín. Afrontamos güei esti desafíu: reflexonar sobre’l puestu específicu de la muyer, incluso ellí onde s’exercita l’autoridá nos estremaos ámbitos de la Ilesia”. El conceptu, formuláu pol papa Francisco durante la entrevista que concedió a la revista xesuita Civiltà Cattolica, fue la definición más contundente que se-y conoz hasta agora –anque non la única- al pontífiz arxentinu sobre’l futuru del papel de la muyer na Ilesia, lo qu’abrió les puertes a delles especulaciones acerca de cómo tendría de ser.

Nun se sabe qué ye lo que Francisco tien en mente nesti sentíu. Nin siquiera si va tomar una midida concreta. Lo que ta claro ye que nun quier que les muyeres seyan namás “catequistes o directores de la Cáritas parroquial”. Y que desa promover un debate internu sobre’l tema. Pero tamién recordó que la Ilesia dixo non al sacerdociu femenín. La razón que s’esgrime ye que Xesús elixó homes como apóstoles y otru tantu ficieron ellos colos sos collaboradores.

D’ehí qu’una primera especualación que se fai –descartáu’l sacerdociu femenín- ye que la muyer podría ocupar munchos más cargos, y ciertamente enforma más relevantes, nel Vaticanu de los qu’ocupa agora. Asina, por exremplu, qu’una casada pudiera presidir –acaso xunto al so maríu- el Pontificiu Conseyu pa la Familia. Pero hai otra especualción más osada qu’entama facese: que’l papa podría crear un cardenal muyer. Lo que diba ser un blincu cualitativu descomanáu porque los cardenales son los principales conseyeros del pontífiz y tienen la función d’escoyer papa.