Ismael González Arias.- De María Argüelles, La Pita, desconozse hasta la fecha del so ñacimientu, anque se supón n’Uviéu na década de los ochenta del sieglo XIX. Pocos más datos tiénense de la so vida, aparte de les referencies a les sos cualidaes vocales en boca d’otros intérpretes. El propiu Eduardo Martínez Torner escoyóla, xunto a Cuchichi, pa illustrar una serie de conferencies sobre’l folclor asturianu, que tuvieron una gran repercusión ente les otres voces de la canción asturiana del tiempu. Cuchichi recordaba la brillantez de los sos agúos y la so enorme capacidá pa conmover al auditoriu al entonar añaes como “Crióme mio madre”, cola que finaba cantando a la oreya’l so característicu “ea, ea, ea”.

Lo sorprendente ye que nun se conserven rexistros de los sos tonaes, pero del maxisteriu de los sos intérpretes bebieron otres voces femenines, como les de La Busdonga, La Pichona, Josefina Fernández o Amparo Menéndez. Años más tarde, Diamantina Rodríguez interpretó tonaes sobre’l patrón de Josefina Fernández –de la que tampoco quedó nengún rexistru grabáu-, qu’a la vez bebíen de la memoria de les interpretaciones por María la Pita.

Ñacíu’l 9 de xineru de 1895 na aldea de Casquellu, Felechosa, Altu Ayer, Santos Luciano Alonso Muñiz, Santos Bandera, ye un referente clásicu de la modalidá ayerana, na qu’escribió un bon númberu de lletres y compuso delles de les más renomaes. Nada amigu de participar en concursos, fueron otros intérpretes los que vivieron momentos de gloria coles sos tonaes. Emigrante en Cuba nos Estaos Xuníos, na mocedá, comenzó a interpretar tonaes polos diferentes centros asturianos de dichos países. Al regresu, la so magnífica voz, la so sorprende estatura y el porte de la so figura de galán cinematográficu, convirtiéronlu nuna gran figura de la tonada. Morrió de manera repertina’l 19 d’ochobre de 1948, a la edá de 53 años.

Con too, como sucediera con María la Pita, Santos Bandera nun dexó grabada nenguna tonada, pero la memoria de les sos creaciones perdura ente los sos siguidores. El Rei de les felechosines, como se lu llamó n’alcordanza de la variante d’ayerana por él interpretada, dexó la so impronta en tonaes tan conocíes como “En la cárcel de Llaviana”, “Pendu l’argueyu”, “Pintar pintéla”, “Trenta riales de tachueles”, “La focina na mano”, “Fuente la Fumiosa”...

El tenor Prudencio Merino Álvarez, El Polenchu de Gráu, ñació’l 24 d’ochobre de 1897 na villa de Gráu, fíu de dos vecinos del llugar. El so nomatu viniéra-y, non por nenguna vinculación con dalguna de les Poles, sinon d’una deformación del so propiu nome. Llamáu a files en plena guerra de Marruecos, aprovechó un permisu pa desertar, siendo encarceláu nel calabozu del Cuartel de Santa Clara una vez arrestáu pola Guardia Civil. Trabayó posteriormente de xofer, oficiu nel que siguió durante la guerra civil, siendo conductor d’un militar rusu col que se treslladó, una vez cayida Asturies nes manes del exércitu nacional, a Barcelona. Depués de finada la guerra civil exilióse a Marruecos, morriendo en Tánxer nel añu 1952 ensin tornar a Asturies.

Tampoco d’él nun quedó nin una sola de les sos tonaes rexistraes en discu, a pesar de que se cuenta que fuera tentáu con varios contratos (asina como l’anécdota de que-y unviara una casa discográfica un adelantu de grabación, qu’él gastó unviando a otru nel llugar d’él). De la escelencia de la so voz dan cuenta los sos contemporaneos, apuntando les sos facultaes especiales pa las vaqueras.

Amás de la citada María la Pita, Josefina Fernández ye la otra gran voz de gran influencia na tonada asturiana de la última metada del sieglu XX hasta los nuestros díes. Ñaciera en Xixón el 24 d’agostu de 1910. Yera, pues, quince años más moza que La Busdonga. Y va ser,  a la vez, diez años más grande que la so gran Discípula, Diamantina Rodríguez, cola que va coincidir riba los escenarios. Enle los cantares quela uparon aléxitu nel Babel taba “Carretera de Cualloto”, el buque insignia de La Busdonga. Tamién s’atreviera con “Carromateros”. Dende les primeres semifibales fuera perfilándose como indiscutible ganadora.

La voz de Josefina emprima llamar l’atención dende neña y queda campeona del concursu de tonada del diariu Región del añu 1948. Dos tonaes la lleven al éxitu: la citada “Carromateros” y una soberbia versión de “La Soberana”. Pero, la muerte sorprendióla el 7 de marzu de 1951, con 41 años, y ensin dexar nin un solu rexistru grabáu.

Estes cuatro voces son suficientes como exemplu. De nenguna d’elles queda presencia de la so voz nuna grabación. Con too, la memoria de la so grandeza fai que les sos voces s’alluguen al delláu de les grades de los clásicos de la tonada: El Maragatu, Xuacu’l de Sama, La Busdonga, Quin el Pescador, Los Cuatro Ases, Juanín de Mieres, Lauro, El Panaderu, Diamantina...

Esta memoria tresmitida permite que tovía anguañu dalguién suba al escenariu y cante una tonada que-y aprendió Diamantina a la manera de Josefina que la cantaba por María la Pita. Dalgo que fala a les clares de la vixencia de la tresmisión oral nos nuestros díes. De la memoria d’un silenciu del que conocemos los nomes de persona pero no les voces y que son a la vez memoria d’un silenciu inda más grande: el d’aquellos que los precedieron y de los que nun sabemos siquiera’l nome, pero sabemos tuvieron ehí.