Moscú.- L’informante estadounidense Edward Snowden aseguró nel so primer videu dende que se-y concedió asilu en Rusia que l’Estáu espía a tola población al traviés de “descomanada rede”. Anguañu, les persones en tol mundu tienen claro que los programes de los servicios secretos “yá nun ofrecen seguridá”. “Llimiten la nuestra llibertá de palabra, de pensar, de vivir”, aformó Snowden nel videu colgáu na plataforma WikiLeaks.

Rusia concedió asilu temporal al informáticu que trabayó pal serviciu secretu de l’Axencia Nacional de Seguridá (NSA), depués de que fuxera tres de revelar los secretos sobre los programes estadounidenses de vixilancia d’internet.

Nel videu difundíu estos díes en Moscú vese a Snowden xunta, ente otros, Thomas Drake, que formó parte de la directiva de la NSA hasta que lo dexó en 2001. L’abogada estadounidense Jesselyn Radack, que tamién participó nel alcuentru, alvirtió a Snowden de nun regresar al so páis. “Nos Estaos Xuníos cuerren tiempos mui peligrosos pa los que revelen secretos”, dixo en declaraciones a la televisión rusa RT.

Snowden aportó a Moscú procedente de Hong Kong el pasáu 23 de xunu. Los Estaos Xuníos piden la so extradición pa llevalu ante la xusticia por revelar secretos. Pola contra, Rusia rechaza la so extradición.