Según les estadístiques del Bancu Central, Venezuela vien sufriendo’l más grande incrementu de precios de los últimos 17 años. En septiembre la inflación avanzó 4,4% y nos primeros 9 meses yá acumulaba una suba del 38,7%, que yá supera l’alza añal que rexistraron los precios nel periodu 1997-2012. Asina, al evaluar la inflación rexistrada nos últimos 12 meses yá s’experimenta un incrementu del 49,4%, qu’apunta a qu’esti añu los venezolanos van sufrir un aumentu nel orden del 50% porque hestóricamente nel últimu trimestre ye cuando la inflación acelera con mayor intensidá.

La población siente l’impactu en variables esenciales pa la calidá de vida. En septiembre los alimentos experimentaron una suba de 5%, polo que nos últimos 12 meses acumulen un incrementu del 69,9%. Ente xineru y septiembre los productos agrícoles encarecieron un 47,3%, los pesqueros un 82,3% y los agroindustriales amuesen un blincu del 49,6%.

La suba nel preciu de los alimentos golpea con mayor fuerza a les families de menos ingresos que destinen el 45% de salariu a la compra de comida. El preciu del vistíu y el calzáu acumula un aumentu no que va d’añu del 38,2%, los servicios de salú del 22,9%, l’equipamientu del llar del 30,6% y el tresporte del 38,3%.

Asinamensmo, linforme d’escasez de Caracas correspondiente a l mes pasáu rexistra que 17 alimentos básicos afayábense na categoría de serios problemes d’abastecimientu, ye dicir, escasez superior al 41%. L’informe del Bancu Central fala d’alimentos como lleche en polvo, azucre, aceite, farina de maíz y mantega.