Esti miércoles, 16 d’ochobre, va tener llugar la presentación de la 17ª edición del Concursu de Canción Asturiana Cuenca del Caudal, ún de los grandes concursos de la primera división de la tonada, al par del Concursu de la Canción de les Mines de La Nueva (Llangréu), el Ciudá d’Uviéu del Teatru Filarmónica y el Concursu de Xixón que tien llugar a lo llargo del branu na Plaza Mayor.

Nesta presentación van tar presentes los ganadores de la pasada edición: Marisa Valle Roso y Andrés Cueli. Xunto a los segundos y terceros clasificaos: Lorena Corripio, Álvaro Fernández Conde, Liliana Castañón ya Isaac Sierra Longo. Igualmente van intervenir los miembros del xuráu, que nesta edición va tar integráu por Luis Estrada, Anabel Santiago y Xaime Arias. A lo que va sumase’l gaiteru oficial del concursu, Pablo Carrera, reciente ganadoir de la edición d’esti añu del Premiu al Meyor Gaiteru Acompañante de Tonada 2013 del Memorial Silvino Argüelles.

Esti Festival, presentáu por Sonia Fidalgo y Alberto Cienfuegos “Michel”, va contar cola presencia del cantautor de Les Cuenques, Pablo Cienfuegos, una de les grandes voces que participan recientemente nel conciertu del Día d’Asturies dedicáu al repertoriu de Víctor Manuel. Esti Festival tendrá llugar nel Auditoriu Teodoro Cuesta de Mieres, a partir de les 19:30h y la entrada va ser llibre