Esti sábadu, 12 d’chobre, a partir de les 19:00h va tener llugar nel Auditoriu Teodoro Cuesta de Mieres el festival conmemorativu del XXV Aniversariu del Grupu Baille L’Artusu, una de les formaciones rellacionaes col folclor asturianu de más grande raigañu en Les Cuenques.

El festival va contar con una serie de sorpreses musicales y de baille, na que van participar los propios miembros del grupu, y nel que ase va dar un respasu xeneral a la música y la danza del conceyu, pero tamién a tola de la comarca y d’Asturies en xeneral, yá que dientro del repertoriu d’ésti, como de tantos otros grupos, s’alcuentra bona parte de la cultura folclórica de l’Asturies más plural, del oriente al occidente.

Asina, esta formación que naciera nel llugar de Peñuli, parroquia de Figareo, onde entama’l Valle de Turón, va amosar a tolos espectadores que s’averen al Auditoriu mierense pieces tan reputaes del so repertoriu como la muñeira y la xota del pueblu turonés de Carcarosa, o la xota de Parana, del pueblu del mesmu nome del conceyu vecín.

P’acceder al recintu del Auditoriu Teodoro Cuesta requierse invitación, que vien siendo entregada polos componentes del grupu baille dende va selmanes. Sicasí, una vez qu’entre tol públicu provistu d’invitación, como siempre ocurre nestos casos, l’accesu ye llibre.