Daniel Fernández aseguró que lo único que quedó claro ye que somos una rexón ensin personalidá nin pesu dalgunu

El voceru nacional de Compromisu por Asturies, Daniel Fernández, treslladó la valoración sobre’l Debate de la Rexón, onde aseguren que la gran ausente foi Asturies.

Pa Compromisu por Asturies la mesma denominación del alderique “como Debate de la Rexón”, que podría denominar cualquier tipu d’alderique dende una provincia a una Comunidá Autónoma, demuestra’l deséu de que Asturies nun tenga nin personalidá nin pesu políticu dalgunu” lo que según la organización “plasmose clarísimamente nel deseldroncu del mesmu”.

Compromisu por Asturies destacó que “UPyD amosó otra vegada que la so única intención dientro de la política asturiana ye ser la vocera de les prioridaes polítiques de Rosa Díez a nivel estatal” asina, “fora de la reforma electoral, esmolecióse más de falar del modelu d’Estáu y criticar al PSOE pola so posición dubiosa frente a Catalunya na defensa de la unidá d’España”, lo cual “yera lo esperao d’un diputáu que se presentó en sociedá con Rosa Díez diciéndo-y lo que podía dicir y lo que nun podía dicir”.

Pa Compromisu por Asturies “IX amás de siguir cola so reclamación de la reforma electoral, dedicó’l so tiempu a intentar demostrar que nun son una mera muleta del PSOE, perdiendo la oportunidá d’esplicar que proyectu tienen pa Asturies” y a valorar “los rendimientos de la so participación nos gobiernos anteriores de PSOE-IU, centrando les sos intervenciones en falar del pasáu en cuenta de la so visión sobre’l futuru de Asturies”.

Pa Compromisu por Asturies el PP “caltuvo una posición imposible, defendiendo que Asturies nun ye la Comunidá peor tratada nos Presupuestos Xenerales del Estáu, cuando rescampla que sí, y criticando los retayos que se faen en Asturies y defendiendo los que se faen en Madrid” con un discursu tan caóticu que “ensin querer llegó a criticar a Rajoy, asegurando que resabia de presidentes que nun s’alleguen al Parlamentu, lo que provocó les rises xeneralizaes de los presentes, como reflexu de lo que fueron les sos intervenciones polo xeneral”.

Compromisu por Asturies afirmó que “Foru ye la esencia de Francisco Álvarez Cascos, que centró’l so discursu nuna crítica constante al gobiernu, que básicamente yera puru y duru revanchismo contra l’actitú de la que yera la oposición mientres el so gobiernu, que más allá de la veracidá de les sos acusaciones, poco apurre nin al alderique políticu nin a atopar soluciones a los problemes d’Asturies”.

Decepcionante foi pa Compromisu por Asturies “la intervención de Javier Fernández, que básicamente se centró que’l gobiernu central ye’l culpable de too, pero que polo qu’él denomina llealtá institucional, tampoco va faer nada al respectu” y lo único destacable de la so intervención foi “reconocer que los únicos que van defender a Asturies frente a los abusos de Madrid son los nacionalistes, lo que nun podemos tar más d’alcuerdu, anque para él eso ye populismu pero pa nós ye’l centru de la nuesa actividá, defender los intereses de Asturies y especialmente de los que peor lo pasen na nuesa tierra”.

Daniel Fernández tamién señaló temes que rellumaron pola so ausencia, asina “el tema de los desahucios, drama social que paez que nun interesa, non tuvo huecu nel alderique” tampoco se faló “de los retayos en cultura polo xeneral y en particular a tola creación en asturianu, más allá del prerrománicu, de fechu Javier Fernández namái se refirió a esti tema pa criticar que’l PP, que quier esaniciar entidaes púbiques, llevaba nel so programa la creación una Escuela de Música Tradicional y de Gaita, demostrando la so obsesión por esaniciar tou lo que lu recuerde a esa Asturies que gobierna”, tampoco se faló de “los retayos en competencies autonómiques y locales que se tán preparando dende’l gobiernu central, arrenunciando a lluchar pol nuesu autogobiernu”, nin del aumentu de la represión social, tantu por temes llaborales como sociales, pasando pola llucha contra los desahucios, más allá del pidimientu d’IX de retirar la denuncia de SEDES a integrantes de La Madreña pola ocupación de la Conseyería de Salú abandonada d’Uviéu, que sofitamos totalmente” concluyó.