L’asociación Xueces pa la Democracia tien criticao güei a les instituciones estatales que siguen faciendo dexación de les sos funciones pa que se conoza ya investiguen los crímenes cometíos pol franquismu, “que quedaron materialmente sapozaos nel escaecimientu y provocaron una grave impunidá” con normes como la Llei d’Amnistía de 1977, que derogó la mayoría de los delitos cometíos enantes d’esa fecha.

Nun comunicáu, el collectivu profesional de maxistraos denunció que’l Gobiernu nun acata l’informe de la ONU pa que s’incluya nel Códigu Penal el delitu autónomu de Desaparición Forzada, proporcionar un mayor apoyu institucional y financieru a los familiares de desaparecíos y proveer de fondos a la Llei de Memoria Hestórica p’aplicala de manera eficaz.

Nel ámbitu xudicial, Xueces pa la Democracia instó al Estáu a adoptar les midíes llegales y xudiciales necesaries p’asegurar que les desapariciones forzaes nun seyan crímines suxetos a amnistía; y a los responsables directos de l’alministración de xusticia, xueces y fiscales, a que se personen nes exhumaciones y depués analicen y actúen sobre los resultaos que les mesmes arroxen.

L’obxetivu ye impidir que sigan existiendo decenes de miles de persones enterraes en foses comunes, lo qu’asitia a España como’l segundu país del mundu, tres de Camboya, con más grande númberu de persones víctimes de desapariciones forzaes con resultaos que nun fueron recuperaos nin identificaos