Les llinies maestres de protocolu ríxense pola antigüedá de les instituciones. Asina, el títulu de Principe d’Asturies surde en 1388 y cásique dos sieglos enantes yá existe documentación del conceyu d’obispalía de Teberga. Pero, dende 1033 consta El Privilexu de Parmu de La Foceil.la, que devino posteriormente en El Privilexu de Teberga.
Colo que, por estrictu orden de protocolu, al ser El Privilexu un títulu real individual qu’afecta a tolos vecinos de Teberga y a los orixinarios d’esti conceyu, cualquiera d’ellos tien más derechu a presidir l’actu que’l propiu Príncipe d’Asturies.
El Privilexu de Parmu de La Foceil.la (Páramo de la Focella, na documentación castellana) y, depués, cuando se xuntaron los dos conceyos, el Privilexu de Teberga, dicía que los privilexaos nun teníen de pagar nengún tributu a naide, salvo’l diezmu de Dios. Recibiólu Manulfo, cognomináu Bellito Aurioles, del Rei Vermudu III y confirmáronlo sucesivamente’l restu los Reis.
Parecía un Privilexu territorial. Pues bien, en 1543, una familia González, vecinos de Granada, yeren conscientes de ser orixinarios del Parmu de La Foceil.la. El 19 d’ochobre de 1776, miembros d’esta familia González, a partir d’esta consciencia d’orixen teberganu, obtuvieron una Provisión Real de Carlos III, depués de recordar que fuera “Conzedido en el año pas.do de mil y uno a Bellito Aurioles y a toda su descendencia”. Fechu que sorprende porque, los terminos del Privilexu entendíense como personales y reclamábense en Granada, a 1000 km de Parmu.
Esti documentu plantea que talu Privilexu yera extensivu a tolos descendientes, homes y muyeres, del Parmu de La Foceil.la, tuvieran l’apellíu González (al qu’enantes o depués añadieron Aurioles) o cualuquier otru.
Na dirección http://dialnet.unirioja.es/servlet/articulo?codigo=670252 pue consultase l’orixinal del documentu fecháu’l 16 de septiembre de 1033 pol que Vermudo III concede a Manulfo, nomáu Vellito Aurioles, y a los sos descendientes, ela carta d’inxenuidá (páxina 98 del pdf, documentu 15). Como carta d’inxenuidá y d’exención de tributos conclúi “ad nullum hominem viventem super terram… sed soli Deo omnipotenti”: a nengún home viviente sobre la tierra… sinon namás qu’a Dios omnipotente.
A lo llargo de los sieglos, el Privilexu extendióse a toles xeneraciones de los descendientes del supuestu Bellito Aurioles, centróse en Parmu de La Foceil.la, tresmitióse per llinia materna, pidióse confirmación una y otra vuelta a los Reis, que lo ficieron, ya incluso amplióse a una decaración d’adopción rexia que bien podría ser ún de los sentíos de la palabra “ingenuitas” y un supuestu drechu a recibir cases y tierres onde fueren.
L’abolición definitiva del Privilexu de Teberga, xunto col restu de privilexos del territoriu español, entiéndese que llegó col gobiernu lliberal de 1837, durante la Rexencia de María Cristina de Borbón. Con too, los vecinos y los descencientes orixinarios de Teberga siguen siendo conscientes d’esta pertenecencia a El Privilexu.
