La película Gravity d’Alfonso Cuarón ta consiguiendo poner d’alcuerdu a crítica y públicu con un gran éxitu na so estrena. Con too, la comunidá científica y los espectadores curiosos vienen enllenando la rede, nestos pocos díes que van dende la estrena, con toa una llarga riestra de preguntes sobre les “imperfecciones” qu’aparecen nel filme.

Estes son delles de les preguntes que vienen surdiendo:

“Si hai gravedá cero, ¿por qué los pelos de Sandra Bullock nun se mueven?”

“Si tolos satélite de la Tierra orbiten d’oeste a este, ¿cómo ye posible que la basura espacial de la película –la que xenera los más grandes momentos de tensión- orbita d’este a oeste?”

“Cuando George Clooney suelta la correa de Sandra Bullock, él s’allonxa d’ella. En gravedá cero, un solu tirón llevaríalos xuntos”.

“¿Por qué’l telecopiu espacial Hubble, la Estación Espacial Internacional (ISS) y la estación xina vense nel mesmu planu visual, una detrás de la otra? El Hubble afáyase a 563 km d’altitú y la ISS a 370 km”.

“¿Por qué una médica, Sandra Bullock, ta reparando’l telescopiu espacial Hubble nel empiezu de la película y na escena na que s’orixina l’accidente?”

Hai dalguna pregunta más, pero proponéles equí desvelaría’l final. En previsión de qu’haya llectores que tovía nun la vieran, dexámosles pa más alantre.

Con too, la película ye bien estresante y los momentos d’acción xeneren grandes estaos d’ansiedá nos espectadores. Entiéndese , asina, que tea batiendo récores de taquilla y que tea contando cola bendición de la prensa especializao. Ensin dulda, va ser una de les grandes candidates a los Oscar.