Por Ismael González Arias.- Va cuatro o cinco años intenté alcontrar dellos discos que me faltaben en Tánxer y en Tetuán. Dos ciudaes importantes, tanto n’habitantes como a nivel de programaciones culturales. Sorprendióme la práctica desaparición de les tiendes especializaes en música y, en dellos casos, la so reconversión al mercáu pirata. Pedíes un discu del autor más de moda y mandábente esperar un momentu. En cuestión de minutos teníes nel to poder un CD pirateáu, con carátula y too, al modu y manera nel qu’agora nos lo acerquen en cualaquier cai y mercadillu nel top manta.

Ún de los discos que buscaba yera Amal hayati (El amor de la mio vida), d’Om Khalsoum. Remitiéronme a la tienda rexentada por un salafista, yá que se trataba d’un discu que se salía del mercáu de superventes reciente. Nesti casu les copies, igualmente pirateaes, vendíense en casete.

Esti fechu de nun existir nin una sola tienda de venta llegal de discos pude constatalu personalmente, amás d’en Marruecos, en Túnez y en Xordania. Y, al traviés d’otros informantes, de llugares como Senegal y Nixeria (el más grande mercáu africanu).

La situación ye enforma asemeyada n’España (y tampoco se diferencia muncho de la de Portugal, Italia, Francia o Grecia). La cayida de les ventes de discos orixinales acarretó la desaparición d’un bon númberu de tiendes especializaes. Permanecen, sicasí, les ubicaes en centros comerciales. Sigue funcionando la compra d’orixinales nel mercáu del regalu y, tamién, nel de la persona mayor que nun ye quién a acceder fácilmente a les nueves tecnoloxíes.

Nesti últimu sentíu, alviértese que les descargues d’internet y el piratéu de discos malapenes tien afectao a los mercaos pequeños, como l’asturianu. Vicente Díaz, con Montes cantábricos, averóse a los diez mil exemplares vendíos. Y, con too, tamos falando d’un intérprete asturianu al que sí se-y pirateó l’últimu trabayu. Otros intérpretes, cásique toos vinculaos al ámbitu de la tonada, rolden los dos mil exemplares vendíos. En tou casu, cantidaes inimaxinables pa intérpretes qu’abarquen tol mercáu español y nun son quién a llegar a esos númberos de ventes.

Ye cierto que les descargues d’internet y la piratería en xeneral afecta al mercáu de ventes. Pero, principalmente, a productos comerciales y a grandes empreses del sector. Pola contra, el númberu de ventes de productos musicales asturianos nel mercáu propiu non solo nun descendió sinon que nun paró de medrar. Lo que significa que posiblemente nun se va dar el casu de qu’exista un nuevu Hevia que venda dos millones de discos. Pero, esi fechu, bien importante económicamente pa les grandes multinacionales y pal propiu artista, tien escasísima incidencia nes pequeñes empreses asturianes del sector y nel gran númberu d’artistes qu’equí viven de la música.

Francis Drake fuera corsariu, explorador, comerciante d’esclavos, políticu y vicealmirante de la Royal Navy. Nos llibros ingleses d’Hestoria, un héroe nacional (anque dellos permitiéranse comentarios adicionales na sección de llectures). Nos llibros españoles, onde se lu llamaba Francisco Draque, un pirata despiadáu. La reina Isabel II d’Inglaterra acabó dándo-y un títulu y un requexu honorable na memoria del so pueblu. D’ehí que se siga diciendo, na so alcordanza, que “la hestoria siempre absuelve a los pirates”.